சீனாவின் மக்கள்தொகை கடந்த 10 ஆண்டுகளில் குறைவான வளா்ச்சி விகிதத்தைப் பெற்று 141 கோடியாக உயா்ந்துள்ளது.
சீனா செவ்வாய்க்கிழமை வெளியிட்ட, 7-ஆவது தேசிய மக்கள்தொகை கணக்கெடுப்பு மூலம் இத்தகவல் தெரியவந்துள்ளது.
அதன் விவரம்:
சீனாவின் 31 மாகாணங்கள், தன்னாட்சி பிராந்தியங்களில் மேற்கொள்ளப்பட்ட கணக்கெடுப்பின்படி 2020-ஆம் ஆண்டில் மொத்த மக்கள்தொகை 141 கோடியாக உயா்ந்துள்ளது. 2010-ஆம் ஆண்டுடன் ஒப்பிடுகையில் இது 5.38 சதவீதம் அல்லது 7.2 கோடி அதிகமாகும். இந்த எண்ணிக்கையில் ஹாங்காங், மகாவ் ஆகிய பிராந்தியங்கள் சோ்க்கப்படவில்லை.
‘சீன மக்கள்தொகை கடந்த 10 ஆண்டுகளாக மெதுவான வளா்ச்சியை தக்கவைத்துக் கொண்டு வருவதாக’ தேசிய புள்ளியியல் பிரிவு தலைவா் நிங் ஜிஜே தெரிவித்துள்ளாா்.
சீனா 10 ஆண்டுகளுக்கு ஒருமுறை மக்கள்தொகை கணக்கெடுப்பை நடத்தி வருகிறது. 2010-ஆம் ஆண்டு மக்கள்தொகை வளா்ச்சி விகிதம் 0.57 சதவீதமாக இருந்த நிலையில், கடந்த ஆண்டு கணக்கெடுப்பில் வளா்ச்சி விகிதம் 0.53 சதவீதமாக உள்ளது. 2000-ஆவது ஆண்டில் இந்த வளா்ச்சி விகிதம் 1.07 சதவீதமாக இருந்தது.