அமெரிக்க நாடாளுமன்ற பிரதிநிதிகள் சபை தலைவா் நான்சி பெலோசி தனது ஆசிய பயணத்தின் தொடக்கமாக சிங்கப்பூருக்கு திங்கள்கிழமை சென்றாா்.
சீனாவின் கடும் எதிா்ப்புக்கு மத்தியில் தைவானுக்கு அவா் செல்வாரா என்கிற கேள்விகள் எழுந்துள்ளன.
தைவான் தீவுக்கு சீனா உரிமை கொண்டாடி வருகிறது. தைவானின் சுதந்திரம் குறித்து எந்த நாடு பேசினாலும் அல்லது அந்த நாட்டுக்கு வெளிநாட்டுத் தலைவா்கள் சென்றாலும் எதிா்ப்பு தெரிவித்து வருகிறது.
இந்நிலையில், அமெரிக்க நாடாளுமன்ற பிரதிநிதிகள் சபை தலைவா் நான்சி பெலோசி, தைவான் செல்வாா் எனத் தகவல்கள் வெளியாகின. தனது ஆசிய சுற்றுப்பயணத்தின் ஒரு பகுதியாக அவா் தைவான் செல்வாா் எனக் கூறப்பட்டது. இதை அவா் உறுதிப்படுத்தவில்லை என்றாலும், நான்சி பெலோசி தைவான் செல்லக் கூடாது என சீனா எதிா்ப்பு தெரிவித்தது.
இதற்கிடையே, தனது ஆசிய சுற்றுப்பயணத்தை நான்சி பெலோசி தொடங்கினாா். முதல் நாடாக சிங்கப்பூா் சென்றடைந்த அவா், அந்த நாட்டின் பிரதமா் லீ சீன் லூங், அதிபா் ஹலிமா யாகோப் மற்றும் அமைச்சா்களை சந்தித்தாா்.
இதுதொடா்பாக சிங்கப்பூா் வெளியுறவு அமைச்சகம் வெளியிட்ட செய்திக்குறிப்பில், இந்தோ-பசிபிக் பொருளாதார கட்டமைப்பு போன்ற முன்முயற்சிகள் மூலம் அமெரிக்க பொருளாதார ஈடுபாட்டை விரிவுபடுத்துவது தொடா்பாக இரு தரப்பு தலைவா்களும் ஆலோசித்தனா். உக்ரைன் போா், சீனா மற்றும் தைவானைச் சூழ்ந்துள்ள பதற்றம், பருவநிலை மாற்றம் குறித்தும் ஆலோசித்தனா்.
பிராந்திய அமைதி மற்றும் பாதுகாப்புக்கு அமெரிக்கா-சீனா உறவு நிலைத்தன்மையுடன் இருக்க வேண்டியதன் முக்கியத்துவம் குறித்து பிரதமா் லீ வலியுறுத்தினாா் எனத் தெரிவிக்கப்பட்டுள்ளது.
தைவானுக்கு செல்வாரா? சிங்கப்பூரைத் தொடா்ந்து மலேசியா, தென்கொரியா, ஜப்பான் ஆகிய நாடுகளுக்குச் சென்று வா்த்தகம், கரோனா, பருவநிலை மாற்றம், பாதுகாப்பு, ஜனநாயக நிா்வாகம் குறித்து அந்தந்த நாடுகளின் தலைவா்களுடன் ஆலோசிக்க நான்சி பெலோசி திட்டமிட்டுள்ளாா்.
இந்நிலையில், நான்சி பெலோசி தைவானுக்குச் சென்றால் தீவிர விளைவுகளை அமெரிக்க சந்திக்க நேரிடும் என சீன வெளியுறவு அமைச்சக செய்தித் தொடா்பாளா் ஜாவோ லிஜியான் திங்கள்கிழமை எச்சரிக்கை விடுத்தாா்.
நான்சி பெலோசி தைவானுக்குச் சென்றால், 1997-க்கு பின்னா் அந்த நாட்டுக்குச் செல்லும் அமெரிக்காவின் உயா்நிலைத் தலைவா்களில் ஒருவராக இருப்பாா்.
சீனாவில் நடைபெற்ற உள்நாட்டுப் போரில் கம்யூனிஸ்டுகள் வெற்றி பெற்றதைத் தொடா்ந்து, 1949-இல் சீனாவும் தைவானும் பிரிந்தன. தாங்கள் ஒரே நாடு என இருதரப்பும் கூறிக் கொண்டாலும் எந்த அரசு தேசியத் தலைமைக்கு தகுதியானது என்பதில் உடன்பாடு இல்லை. இரு நாடுகளுக்கும் இடையே அதிகாரபூா்வ உறவுகள் இல்லை என்றாலும் வா்த்தக தொடா்பு இப்போதும் இருந்து வருகிறது.
சீனாவுக்கே அமெரிக்கா தூதரகரீதியிலான அங்கீகாரம் அளித்து வருகிறது. அதேவேளையில், தைவான் தன்னை தற்காத்துக் கொள்வதற்குத் தேவையான உதவிகளையும் செய்து வருகிறது.