ஒயிட்பீல்டு, கெங்கேரியில் ரயில்கள் நிறுத்தம்

ஒயிட்பீல்டு, கெங்கேரி ரயில் நிலையங்களில் சோதனை முயற்சியாக ரயில்கள் நின்று செல்லும் என்று தென்மேற்கு ரயில்வே அறிவித்துள்ளது.
இதுகுறித்து தென்மேற்கு ரயில்வே வெளியிட்ட செய்திக் குறிப்பு: ரயில் எண்-16315/16316-பெங்களூரு-கொச்சுவேலி-பெங்களூரு விரைவுரயில் ஒயிட்பீல்டு ரயில் நிலையத்திலும், ரயில் எண்-12613/12614-மைசூரு-பெங்களூரு-மைசூரு திப்பு விரைவு ரயில் கெங்கேரி ரயில் நிலையத்திலும் அக்.19 முதல் அடுத்த ஆண்டு ஏப்.18-ஆம் தேதி வரை 6 மாதங்களுக்கு சோதனைமுயற்சியாக நின்று செல்லும்.
ரயில் எண்-16315-பெங்களூரு-கொச்சுவேலி விரைவுரயில் ஒயிட்பீல்டு ரயில் நிலையத்திற்கு தினமும் மாலை 5.34 மணிக்கு வந்து, மாலை 5.35 மணிக்குப் புறப்பட்டு செல்லும். ரயில் எண்-16316-கொச்சுவேலி-பெங்களூரு விரைவுரயில் ஒயில்பீல்டு ரயில் நிலையத்திற்கு தினமும் காலை 7.16 மணி வந்து, காலை 7.27 மணிக்குப் புறப்படும்.
ரயில் எண்-12613-மைசூரு-பெங்களூரு திப்பு விரைவுரயில் கெங்கேரி ரயில் நிலையத்தில் நண்பகல் 1.34 மணிக்கு வந்து, நண்பகல் 1.35 மணிக்குப் புறப்படும். ரயில் எண்-12614-பெங்களூரு-மைசூரு திப்பு விரைவு ரயில் கெங்கேரி ரயில் நிலையத்திற்கு தினமும் மாலை 3.17 மணிக்கு வந்து, மாலை 3.18 மணிக்குப் புறப்படும் என்று அதில் கூறப்பட்டுள்ளது.