பாஜகவின் கர்நாடக சட்டப்பேரவைத் தேர்தல் பிரசாரக் குழுத் தலைவர் பதவியிலிருந்து மத்திய அமைச்சர் சதானந்த கெளடா நீக்கப்பட்டுள்ளார்.
கர்நாடக சட்டப்பேரவைத் தேர்தலை முன்னிட்டு, பாஜக தேர்தல்பிரசாரக் குழுத் தலைவராக மத்திய அமைச்சர் சதானந்த கெளடா நியமிக்கப்பட்டிருந்தார். இந்நிலையில், இப்பதவியில் இருந்து வெள்ளிக்கிழமை சதானந்த கெளடா நீக்கப்பட்டுள்ளார். அதன் பின்னணியில் பாஜக எம்.பி. ஷோபாகரந்தலஜே இருப்பதாக சதானந்த கெளடா குற்றம்சாட்டினார்.
மத்திய அமைச்சராக இருக்கும் சதானந்த கெளடாவுக்கு தேர்தல் பிரசாரக் குழுத் தலைவர் பதவி தேவையா? என்று பாஜக மாநிலத் தலைவர் எடியூரப்பாவிடம் ஷோபாகரந்தலஜே கேள்வி எழுப்பினாராம்.
இதுகுறித்து கர்நாடக பாஜக மேலிடப் பொறுப்பாளரும், மத்திய அமைச்சருமான பிரகாஷ் ஜாவடேகரிடம் எடியூரப்பா விவாதித்துள்ளார். அதன்பேரில், தேர்தல் பிரசாரக் குழுத் தலைவர் பதவியில் இருந்து சதானந்த கெளடா நீக்கப்பட்டுள்ளதாகக் கூறப்படுகிறது. இதைத் தொடர்ந்து, கர்நாடக பாஜகவில் ஓய்ந்திருந்த கோஷ்டிபூசல் மீண்டும் தலைதூக்கியுள்ளது.
கஞ்சா விற்ற மூவர் கைது
பெங்களூரு, அக். 12: பெங்களூரில் கஞ்சா விற்றதாக 3 பேரை போலீஸார் கைது செய்தனர்.
பெங்களூரு யாரப்நகரைச் சேர்ந்தவர் சாதிக்பாஷா (27), யாசீன் (19). இவர்கள் இருவரும் பெங்களூரில் உள்ள கல்லூரிகளுக்கு அருகில் கஞ்சா விற்பனை செய்து வந்தனராம். இதுகுறித்து வழக்குப் பதிந்த போலீஸார், சாதிக்பாஷா, யாசீனைக் கைது செய்து, ரூ. 20 ஆயிரம் மதிப்புள்ள 900 கிராம் கஞ்சாவை பறிமுதல் செய்தனர். இது குறித்து பனசங்கரி போலீஸார் விசாரணை செய்து வருகின்றனர்.
இதேபோல் எலஹங்காவில் உள்ள தனியார் கல்லூரி அருகே கஞ்சா விற்பனை செய்த, அக்ரஹாரா லேஅவுட்டைச் சேர்ந்த தாயிப்பாஷாவைக் (27) கைது செய்த போலீஸார், 250 கிராம் எடையுள்ள கஞ்சாவை பறிமுதல் செய்துள்ளனர். இதுகுறித்து எலஹங்கா போலீஸார் விசாரித்து வருகின்றனர்.