ஈரோட்டில் கூட்டுறவு வார விழா நவம்பர் 14-ஆம் தேதி (செவ்வாய்க்கிழமை) தொடங்குகிறது.
ஈரோடு மாவட்டத்தில் 64-ஆவது அனைத்திந்தியக் கூட்டுறவு வார விழா நவம்பர் 14 முதல் 20-ஆம் தேதி வரை 7 நாள்கள் கொண்டாடப்படவுள்ளது என கூட்டுறவு வார விழாக் குழுத் தலைவரும், ஈரோடு மாவட்ட மத்தியக் கூட்டுறவு வங்கித் தலைவருமான கிருஷ்ணராஜ் தெரிவித்துள்ளார். இதுகுறித்து அவர் வியாழக்கிழமை வெளியிட்ட அறிக்கை:
ஈரோடு மாவட்ட மத்திய கூட்டுறவு வங்கி வளாகத்தில் கூட்டுறவுக் கொடியேற்றுதல், உறுதிமொழி வாசித்தலுடன் விழா நவம்பர் 14-ஆம் தேதி (செவ்வாய்க்கிழமை) காலை 9 மணிக்கு தொடங்குகிறது. முதல்நாள் விழாவாக, கூட்டுறவுகள் மூலம் நல்லாளுகையும் தொழில் முறையாக்கமும் என்ற தலைப்பில் கொண்டாடப்படும். நவம்பர் 15-ஆம் தேதி மாலை 3 மணியளவில் மாவட்ட அளவிலான விழா "உற்பத்தியாளர் முதல் நுகர்வோர் வரை கூட்டுறவுகள்' என்ற தலைப்பில் நடைபெறும்.
இவ்விழாவுக்கு, ஈரோடு மாவட்ட ஆட்சியர் எஸ்.பிரபாகர் தலைமை வகிக்கிறார். அமைச்சர்கள் செங்கோட்டையன், கருப்பணன் சிறப்பு விருந்தினர்களாகப் பங்கேற்கின்றனர்.
நவம்பர் 16-ஆம் தேதி (வியாழக்கிழமை) காலை 10 மணிக்கு ஈரோடு மாவட்ட மத்திய கூட்டுறவு வங்கி வளாகத்தில், கூட்டுறவு மேம்பாட்டுக்கு வழிகோலும் சட்டம் இயற்றல் நாளாக ரத்த தான முகாம் நடைபெறவுள்ளது. நவம்பர் 17-ஆம் தேதி பொதுத் துறையிலும், தனியார் துறையிலும் கூட்டுறவின் கூட்டாண்மை நாளாக சென்குமார் நெசவாளர் கூட்டுறவுச் சங்கத்தில் உறுப்பினர் சந்திப்புக் கூட்டம் நடைபெறவுள்ளது.
நவம்பர் 18-ஆம் தேதி தொழில்நுட்ப விழிப்புணர்வு, "ரொக்கமில்லாப் பரிவர்த்தனை மூலம் நிதியுள்ளடக்களில் கூட்டுறவுகளின் பங்கு' என்ற தலைப்பில் கூட்டுறவு விழிப்புணர்வுக் கூட்டமும், நவம்பர் 19-ஆம் தேதி காலை 8 மணிக்கு "கூட்டுறவுகள்' என்ற தலைப்பில் அய்யம்பாளையம் பால் உற்பத்தியாளர்கள் கூட்டுறவுச் சங்கத்தில் கால்நடை சிகிச்சை முகாமும், 11 மணிக்கு பெஜலட்டி நடுநிலைப் பள்ளியில் பொது மருத்துவ முகாமும் நடைபெறவுள்ளது.
நவம்பர் 20-ஆம் தேதி (திங்கள்கிழமை) "திறன் மேம்பாட்டில் முதன்மைப் பங்காளராகக் கூட்டுறவு' என்ற தலைப்பில் பவானி வேளாண்ம உற்பத்தியாளர்கள் கூட்டுறவு விற்பனைச் சங்கம், பவானி நகராட்சி அலுவலக வளாகம், நகராட்சி பூங்கா ஆகிய இடங்களில் மரம் நடும் விழா நடைபெறவுள்ளது எனத் தெரிவித்துள்ளார்.