பரமத்தி வேலூர் அருகே நன்செய் இடையாறு மகா மாரியம்மன் கோயிலில் திங்கள்கிழமை நடைபெற்ற தீமிதிக்கும் நிகழ்ச்சியில் பல்வேறு மாவட்டங்களைச் சேர்ந்த ஆயிரத்துக்கும் மேற்பட்டோர் பங்கேற்று தீ மிதித்தனர்.
இந்தக் கோயில் பங்குனி மாத தீ மிதித் திருவிழா கடந்த 13-ஆம் தேதி அதிகாலை கம்பம் நடுதலுடன் தொடங்கியது. இதில், ஏராளமான பக்தர்கள் காவிரியில் நீராடி கம்பத்துக்கும், மாரியம்மனுக்கும் பால், தீர்த்தங்கள் ஊற்றி மஞ்சள் கயிறு அணிந்து விரதம் இருந்தனர்.
14-ஆம் தேதி தொடங்கி 25-ஆம் தேதி வரை தொடர்ந்து மாரியம்மனுக்கு சிறப்பு அபிஷேக ஆராதனைகள் நடைபெற்றன. 26-ஆம் தேதி மாலை வடிசோறு நிகழ்ச்சியும், அக்னி சட்டி எடுத்து வரும் நிகழ்ச்சியும் நடைபெற்றன.
27-ஆம் தேதி திங்கள்கிழமை மதியம் ஆண், பெண் பக்தர்கள் காவிரி ஆற்றுக்கு புனித நீராடி ஊர்வலமாக கோயிலை வந்தடைந்தனர். பின்னர், கோயில் முன் அமைக்கப்பட்டிருந்த தமிழகத்திலேயே மிக நீளமானதாகக் கூறப்படும் 63 அடி நீளமும், 6 அடி அகலமும் கொண்ட அக்னிக் குண்டத்தில் ஆண் பக்தர்கள் வரிசையாக தீமித்து நேர்த்திக் கடனை செலுத்தினர். மதியம் 2 மணிக்கு தொடங்கிய குண்டம் இறங்கும் நிகழ்ச்சி இரவு வரை நடைபெற்றது.
பெண் பக்தர்கள் பூவாரி போட்டு நேர்த்திக்கடனை செலுத்தினர். இதில் ஆயிரக்கணக்கான பக்தர்கள் கலந்து கொண்டனர்.
28-ஆம் தேதி கிடா வெட்டும் நிகழ்ச்சியும், அலகு குத்தி வருதல், குழந்தை பேறு பெற்றவர்கள் கரும்பில் தொட்டில் கட்டி குழந்தையுடன் கோயிலை சுற்றி வந்து நேர்த்தி கடனைச் செலுத்துவர். 29-ஆம் தேதி அதிகாலை கம்பம் ஆற்றுக்குச் செல்லும் நிகழ்ச்சியும், மஞ்சள் நீராடல் நிகழ்ச்சியும் நடைபெறுகின்றன.
சிறப்புப் பேருந்து: திருவிழாவையொட்டி அரசு பேருந்து கழகம் சார்பில் சிறப்புப் பேருந்துகள் இயக்கப்பட்டன.
விழா ஏற்பாடுகளை நன்செய் இடையாறு மகா மாரியம்மன் கோயில் எட்டுப்பட்டி அறங்காவலர் குழுவினர், விழாக் குழுவினர், ஊர் மக்கள் செய்திருந்தனர்.