கால்நடைகளுக்கு பொங்கல் உணவாக கொடுக்க வேண்டாம்: கால்நடைத் துறை அறிவுறுத்தல்

பொங்கல் விழாவையொட்டி கால்நடைகளுக்கு அதிகமாக பொங்கல் உணவாக அளிக்க வேண்டாம் என கால்நடைத் துறை அறிவுறுத்தியுள்ளது.
புதுச்சேரி கால்நடை பராமரிப்பு மற்றும் கால்நடைத் துறை சார்பில் வெளியிடபட்ட செய்திக் குறிப்பு: பொங்கல் மற்றும் மாட்டுப் பொங்கலின்போது விவசாயிகள் பொங்கலை கால்நடைகளுக்கு உணவாக அளித்து கொண்டாடுவர். இவற்றை சிறிதளவு கால்நடைகள் சாப்பிடுவதால் பாதிப்பு இல்லை. மாறாக, அதிகம் சாப்பிடும்போது, இரைப்பையில் புளிப்புத் தன்மை அதிகரிக்கிறது. இதனால், நன்மை செய்யக்கூடிய நுண்ணுயிரிகள் அழிந்துவிடுகின்றன.
எனவே, செரிமானம் தடைபடும்போது, தேவையில்லா தீமையளிக்கும் நுண்ணுரிகள் உருவாகிவிடும். சோர்வு, பசியின்மை, அசைப்போடுவது நின்றுவிடுதல், வயிறு உப்புதல், வயிற்றுப் போக்கு ஆகியவை நோய்க்கான அறிகுறியாகும். எனவே, கால்நடைகளுக்கு பொங்கல் சாதம் மற்றும் அரிசி உணவு அளிப்பதை தவிர்த்து தங்களது கால்நடைகளை நோய் மற்றும் இறப்பிலிருந்து பாதுகாத்துகொள்ள கேட்டுக்கொள்ளப்படுகிறது.