முன்னாள் முதல்வர் எம்ஜிஆர் நூற்றாண்டு விழா கொண்டாட்டம் தொடர்பான அதிமுக நிர்வாகிகள் ஆலோசனைக் கூட்டம் தூத்துக்குடியில் வியாழக்கிழமை நடைபெற்றது.
இக்கூட்டத்துக்கு, கட்சியின் மாவட்டச் செயலர் சி.த. செல்லப்பாண்டியன் தலைமை வகித்தார். சட்டப்பேரவை உறுப்பினர்கள் ஆர். சுந்தரராஜ், உமா மகேஸ்வரி ஆகியோர் முன்னிலை வகித்தனர்.
கூட்டத்தில், "தூத்துக்குடி மாவட்டத்தில் 3 நாள்கள் அனைத்து இடங்களிலும் அதிமுக கொடியேற்றியும், நல உதவிகள் வழங்கியும் எம்ஜிஆர் நூற்றாண்டு விழாவை கொண்டாடுவது' என முடிவு செய்யப்பட்டது. இதில், சட்டப்பேரவை முன்னாள் உறுப்பினர் செல்லத்துரை, மாவட்ட கூட்டுறவு வங்கித் தலைவர் பி.டி.ஆர். ராஜகோபால், மாவட்ட இலக்கிய அணிச் செயலர் நடராஜன், முன்னாள் துணை மேயர் பீ. சேவியர், மகளிரணிச் செயலர் குருத்தாய் உள்ளிட்ட நிர்வாகிகள் கலந்துகொண்டனர்.