மக்கள் குறை தீர்க்கும் நாள் கூட்டம் பயனாளிகளுக்கு நலத்திட்ட உதவிகள்

ஆட்சியர் அலுவலகக் கூட்டரங்கில் திங்கள்கிழமை நடைபெற்ற மக்கள் குறைதீர்க்கும் நாள் கூட்டத்தில் பயனாளிகளுக்கு நலத்திட்ட உதவிகள் வழங்கப்பட்டது.
ஆட்சியர் கு.கோவிந்தராஜ் தலைமையில் நடைபெற்ற இக்கூட்டத்தில் முதியோர் உதவித்தொகை, விதவை உதவித்தொகை, கணவனால் கைவிடப்பட்டோர் உதவித்தொகை, மாற்றுத்திறனாளிகள் உதவித்தொகை, வீட்டுமனை பட்டா,
வேலைவாய்ப்பு, காவல்துறை நடவடிக்கை, புதிய குடும்ப அட்டை, கல்விக்கடன், தொழில் கடன், குடிநீர் வசதி, சாலை வசதி, அடிப்படை வசதிகள் மேம்பாடு உள்ளிட்ட பல்வேறு கோரிக்கைகள் தொடர்பாக மொத்தம் 297 மனுக்கள் வரப்பெற்றன.
பொதுமக்கள் அளித்த கோரிக்கை மனுக்களை பெற்றுக்கொண்ட மாவட்ட ஆட்சியர் அவற்றை பரிசீலித்து சம்பந்தப்பட்ட துறை அலுவலர்களிடம் வழங்கி அவற்றின் மீது உடனடி நடவடிக்கை எடுக்க  உத்தரவிட்டார்.  
கூட்டத்தில் இன்று (திங்கள்கிழமை) மனு செய்த முதியோருக்கு உடனடி நடவடிக்கை மேற்கொண்டு, அவருக்கு முதியோர் உதவித்தொகை பெறுவதற்கான ஆணையினையும், மாற்றுத்திறனாளிகள் நலத்துறை சார்பில் ஒரு பயனாளிக்கு ரூ.8,000 மதிப்பீட்டில் எழுத்துக்களை பெரிதாகக் காட்டி சுயமாக படிக்க உதவும் கருவியையும், மற்றொரு பயனாளிக்கு ரூ.4,350 மதிப்பில் காதொலிக்கருவியினையும், முழுமையாக கண் பார்வையற்ற ஒரு பயனாளிக்கு மாதாந்திர உதவித்தொகை வழங்குவதற்கான ஆணையினையும் ஆட்சியர் வழங்கினார்.
நிகழ்ச்சியில், மாவட்ட வருவாய் அலுவலர் ச.சூர்யபிரகாஷ், மாவட்ட ஊரக வளர்ச்சி முகமை திட்ட இயக்குநர் கவிதா, மக்கள் குறைதீர்க்கும் தனித்துணை ஆட்சியர் ஜான்சிராணி மற்றும் அரசு அலுவலர்கள் உட்பட பலர் கலந்து கொண்டனர்.