பாரம்பரியத்தை கொண்டு செல்வது நம் கடமை

எதிர்காலச் சந்ததியினருக்கு பாரம்பரியத்தை கொண்டு செல்வது நம் ஒவ்வொருவரின் கடமை என்றார் மாவட்ட ஆட்சியர் கு. கோவிந்தராஜ்.
கரூர் மாவட்டம் மாயனூர் அம்மா பூங்காவில் சுற்றுலாத் துறை மூலம் நடைபெற்ற பொங்கல் விழாவைத் தொடக்கிவைத்து மேலும் அவர் பேசுகையில், தமிழர்களின் ஒட்டுமொத்த விழாக்களில் உச்சமாகத் திகழும் பொங்கல் விழாவை சுற்றுலாத் துறை மூலம் பாரம்பரிய கலை நிகழ்ச்சிகளுடன் கொண்டாட அரசு ஆணையிட்டுள்ளது. நம் எதிர்காலச் சந்ததியினருக்கு நமது பாரம்பரியங்களையும், கலை, கலாசாரத்தையும் கொண்டுசெல்வது நம் ஒவ்வொருவரின் கடமை. அப்படியே பழைமை மாறாமல் கொண்டு செல்லவே இதுபோன்ற விழாக்கள் கொண்டாடப்படுகின்றன என்றார்.
நிகழ்ச்சியில் கிருஷ்ணராயபுரம் எம்எல்ஏ எம். கீதா, மாவட்ட வருவாய் அலுவலர் ச. சூர்யபிரகாஷ், ஊரக வளர்ச்சி முகமைத் திட்ட இயக்குநர் எஸ். கவிதா, மாவட்ட ஆட்சியரின் நேர்முக உதவியாளர் (பொது) சைபுதீன், உதவி சுற்றுலா அலுவலர் காமிலாஅன்சர், வட்டார வளர்ச்சி அலுவலர் புவனேஸ்வரி உள்ளிட்டோர் பங்கேற்றனர்.