உங்கள் பேரனுக்கு கன்னி லக்னம், மிதுன ராசி, மிருகசீரிஷ நட்சத்திரம் என்று வருகிறது. லக்னாதிபதி மற்றும் தொழில் ஸ்தானாதிபதியான புதபகவான் தொழில் ஸ்தானத்திலேயே ஆட்சி பெற்று குரு, சந்திர பகவானுடன் இணைந்திருக்கிறார். பூர்வபுண்ணிய ஸ்தானாதிபதியான சனிபகவான் உச்சம் பெற்று ராகுபகவானுடன் இணைந்திருப்பதால் அஷ்ட மஹாநாக யோகம் உண்டாகிறது. மேலும் அதோடு தற்சமயம் ராகுபகவானின் தசையும் நடக்கத் தொடங்கியுள்ளது. சனி, ராகு பகவான்களை குருபகவான் பார்வை செய்வதால் ராகுபகவானின் தசையில் குடும்பத்தின் வளர்ச்சி சிறப்பாக அமையும். எதிர்காலம், கல்வி, உத்தியோகம் ஆகியவை மேன்மையாக அமையும். பிரதி செவ்வாய்க்கிழமைகளில் துர்க்கையம்மனை வழிபட்டு வரவும்.