நாட்டின் மிகப்பெரிய கார் தயாரிப்பு நிறுவனமான மாருதி சுஸுகியின் வாகன விற்பனை சென்ற டிசம்பரில் 1 சதவீதம் சரிவடைந்தது.
இதுகுறித்து அந்த நிறுவனம் வெளியிட்டுள்ள அறிக்கையில் தெரிவித்துள்ளதாவது: மாருதி சுஸுகி சென்ற டிசம்பரில் 1,17,908 கார்களை விற்பனை செய்தது. கடந்த ஆண்டு இதே கால அளவில் விற்பனையான 1,19,149 கார்களுடன் ஒப்பிடுகையில் இது 1 சதவீதம் குறைவாகும். உள்நாட்டு சந்தையில் கார்கள் விற்பனை 1,11,333 என்ற எண்ணிக்கையிலிருந்து 4.4 சதவீதம் சரிந்து 1,06,414-ஆக காணப்பட்டது.
குறிப்பாக, ஆல்டோ, வேகன்-ஆர் உள்ளிட்ட குறைந்த விலை கார்களின் விற்பனை 15.3 சதவீதம் வீழ்ச்சியடைந்து 31,527 ஆக இருந்தது. கடந்த ஆண்டில் இதன் விற்பனை 37,234-ஆக காணப்பட்டது. அதேசமயம், கார்கள் ஏற்றுமதி 7,816-லிருந்து 47.1 சதவீதம் அதிகரித்து 11,494-ஆக இருந்தது என்று மாருதி சுஸுகி அந்த அறிக்கையில் தெரிவித்துள்ளது.