தமிழ்த் திரைப்படத் துறையில் சிறந்த படம், நடிகர், நடிகை, தொழில்நுட்பக் கலைஞர்களுக்கான விருதுகளை முதல்வர் எடப்பாடி கே.பழனிசாமி நேற்று அறிவித்தார். 2009-ஆம் ஆண்டு முதல் 2014-ஆம் ஆண்டு வரை ஆறு ஆண்டுகளுக்கான விருதுகள் அறிவிக்கப்பட்டுள்ளன. அதன்படி, 2009-ஆம் ஆண்டு முதல் 2014-ஆம் ஆண்டு வரையிலான விருதுகளின் பெயர்ப் பட்டியலை தமிழக அரசு வெளியிட்டுள்ளது.
இதில் தன்னுடைய படங்களுக்கு விருதுகள் அளிக்கப்படாதது குறித்து இயக்குநர் சுசீந்திரன் வருத்தம் தெரிவித்துள்ளார். அவர் வெளியிட்டுள்ள அறிக்கையில் கூறியதாவது:
என்னுடைய படங்களை எந்த விருதுக்கும் தேர்வு செய்யப்படாததற்குத் தேர்வுக்குழுவுக்கு என்னுடைய வருத்தத்தைத் தெரிவித்துக் கொள்கிறேன். குறிப்பாக தேசிய விருது பெற்ற அழகர்சாமியின் குதிரை மற்றும் அனைவராலும் பாராட்டுப் பெற்ற நான் மகான் அல்ல படத்தின் இறுதிக்கட்டச் சண்டைக்காட்சிக்காக அனல் அரசுவைத் தேர்வு செய்யாததும் எனக்கு ஆச்சர்யத்தை அளிக்கிறது என்று தனது வருத்தத்தை வெளிப்படுத்தியுள்ளார்.