தேசிய விருது கிடைத்தும் மாநில அரசின் விருதில்லையே!

தமிழ்த் திரைப்படத் துறையில் சிறந்த படம், நடிகர், நடிகை, தொழில்நுட்பக் கலைஞர்களுக்கான விருதுகளை முதல்வர் எடப்பாடி கே.பழனிசாமி நேற்று அறிவித்தார். 2009-ஆம் ஆண்டு முதல் 2014-ஆம் ஆண்டு வரை ஆறு ஆண்டுகளுக்கான விருதுகள் அறிவிக்கப்பட்டுள்ளன. அதன்படி, 2009-ஆம் ஆண்டு முதல் 2014-ஆம் ஆண்டு வரையிலான விருதுகளின் பெயர்ப் பட்டியலை தமிழக அரசு வெளியிட்டுள்ளது.

இந்நிலையில் தேசிய விருது பெற்ற ஒரு பாடலுக்கு மாநில அரசின் அங்கீகாரம் கிடைக்காதது ஆச்சர்யத்தை ஏற்படுத்தியுள்ளது. 

2009 - 2014 காலக்கட்டத்தில் வெளியான தமிழ்த் திரைப்படங்களுக்கான அரசு விருதுகளில், சிறந்த பாடலாசிரியர்களுக்கான விருதைப் பெற்றவர்கள்.

2009 - யுகபாரதி
2010 - பிறைசூடன்
2011 - முத்துலிங்கம்
2012 - நா. முத்துக்குமார்
2013 - நா. முத்துக்குமார்
2014 - நா. முத்துக்குமார்

அடுத்தடுத்து 2013, 2014 ஆகிய வருடங்களில் நா. முத்துக்குமார் தேசிய விருதுகளைப் பெற்றார். இப்போது கூடுதலாக அப்பாடல்களுக்கு அரசு விருதுகளும் கிடைத்துள்ளன.

2011-ம் வருடம் தென்மேற்குப் பருவக்காற்று படத்துக்காக தேசிய விருது பெற்றார் வைரமுத்து. ஆனால் தேசிய அங்கீகாரம் பெற்ற அந்தப் பாடலுக்கு(கள்ளிக்காட்டில் பிறந்த தாயே) தற்போது மாநில அரசின் விருது மறுக்கப்பட்டுள்ளது. 

இதேபோல 2011-ம் ஆண்டு வெளிவந்த அழகர்சாமியின் குதிரை-யின் படத்தில் நடித்த அப்புக்குட்டிக்கு சிறந்த துணை நடிகருக்கான தேசிய விருது கிடைத்தது. ஆனால் 2011-ம் ஆண்டுக்கான சிறந்த நடிகருக்கான விருது அவருக்குக் கிடைக்கவில்லை. அந்த வருடத்தின் சிறந்த நடிகருக்கான விருது விமலுக்கும் சிறப்புப் பரிசு சிவகார்த்திகேயனுக்கும் சிறந்த குணச்சித்திர நடிகர் நாசருக்கும் கிடைத்துள்ளது.