பாகுபலி 2 படத்துக்குப் பிறகு அர்ஜூன் ரெட்டி என்கிற மற்றொரு தெலுங்குப் படம் அனைவருடைய கவனத்தையும் ஈர்த்தது. விஜய் தேவரகொண்டா, ஷாலினி பாண்டே நடிப்பில் சந்தீப் வங்கா இயக்கியுள்ள படத்துக்கு நல்ல விமரிசனங்கள் கிடைத்தது மட்டுமல்லாமல் வசூலிலும் அசத்தியது.
இந்நிலையில் இந்தப் படம் தமிழில் ரீமேக் செய்யப்படவுள்ளது. கதாநாயகனாக நடிக்க நடிகர் விக்ரமின் மகன் துருவ் தேர்வு செய்யப்பட்டுள்ளார். துருவ் திரையுலகில் அறிமுகமாகும் படம் இது.
இந்தத் தகவலை இன்ஸ்டகிராம் தளத்தில் நடிகர் விக்ரம் பகிர்ந்துள்ளார். இந்தப் படத்தை விக்னேஷ் சிவன் இயக்கலாம் என்று கூறப்படுகிறது. இருப்பினும் அதுகுறித்த அதிகாரபூர்வ தகவல் வெளிவரவில்லை.