சர்வதேச அளவில் கடந்த ஓர் ஆண்டில் அதிக வருவாய் ஈட்டிய பிரபலங்கள் 100 பேரின் பட்டியலை வெளியிட்டுள்ளது ஃபோர்ப்ஸ் பத்திரிகை. அதில் இரு இந்திய நடிகர்கள் இடம்பிடித்துள்ளார்கள்.
விளையாட்டு வீரர்கள், இசைக் கலைஞர்கள், நடிகர்கள் போன்றோர் இடம்பெற்றுள்ள இந்த ஃபோர்ப்ஸ் பட்டியலில் 50 வயது அக்ஷய் குமாரும் 52 வயது சல்மானும் இடம்பிடித்துள்ளார்கள். ரூ. 277 கோடி சம்பாதித்த அக்ஷய் குமாருக்கு 76-வது இடமும் ரூ. 258 கோடி சம்பாதித்த சல்மான் கானுக்கு 82-வது இடமும் கிடைத்துள்ளன.
இந்தப் பட்டியலில் குத்துச்சண்டை வீரர் ஃபிளாய்ட் மேவெதர் ரூ. 1950 கோடி வருமானத்துடன் முதல் இடத்தைப் பிடித்துள்ளார். கால்பந்துப் பிரபலங்கள் மெஸ்ஸிக்கு 6-ம் இடமும் ரொனால்டோவுக்கு 10-ம் இடமும் நெய்மருக்கு 13-வது இடமும் கிடைத்துள்ளன.
ஜுன் 1, 2017 முதல் ஜுன் 1, 2018 வரையிலான வருவாய் கணக்கிடப்பட்டுள்ளது. படச் சம்பளம் மற்றும் விளம்பர வருவாய் என ஒரு வருடத்தில் கிடைக்கும் ஒட்டுமொத்த வருமானத்தின் கணக்கீடு இது. இதேபோல கடந்த வருடம் வெளியிடப்பட்ட பட்டியலில் ஷாருக் கான், சல்மான் கான், அக்ஷய் குமார் ஆகிய மூன்று நடிகர்கள் இடம்பெற்றார்கள்.