இன்சுலின் உள்ளிட்ட 66 பொருள்களுக்கு ஜிஎஸ்டி குறைப்பு

இன்சுலின் மருந்து, நூறு ரூபாய் வரையிலான சினிமா டிக்கெட் உள்ளிட்ட 66 பொருள்களுக்கான சரக்கு-சேவை வரி (ஜிஎஸ்டி) குறைக்கப்பட்டுள்ளது.
ஜிஎஸ்டி கவுன்சிலின் 16-ஆவது கூட்டம் தில்லியில் மத்திய நிதியமைச்சர் அருண் ஜேட்லி தலைமையில் ஞாயிற்றுக்கிழமை நடைபெற்றது. கூட்டத்துக்குப் பிறகு செய்தியாளர்களிடம் ஜேட்லி கூறியதாவது:
66 பொருள்களுக்கு...: மொத்தம் 133 பொருள்களுக்கான ஜிஎஸ்டி-யைக் குறைக்க வேண்டுமென்று பரிந்துரை வந்திருந்தது. இதில், 66 பொருள்கள் மீதான வரி குறைக்கப்பட்டுள்ளது. லாட்டரி உள்ளிட்டவை மீதான வரி குறித்து வரும் 18-ஆம் தேதி நடைபெறும் ஜிஎஸ்டி கவுன்சில் கூட்டத்தில் விவாதிக்கப்படும் என்றார் ஜேட்லி.
ஜூலை 1-ஆம் தேதி முதல் ஜிஎஸ்டி வரியை அமல்படுத்த மத்திய அரசு முடிவெடுத்துள்ளது. இது சுதந்திர இந்தியாவின் மிகப்பெரிய வரிச் சீர்திருத்தமாகக் கருதப்படுகிறது.
ஜிஎஸ்டி எதிர்பார்ப்புகள்: ஜிஎஸ்டி அமல்படுத்தப்பட்ட பிறகு தாற்காலிகமாக பணவீக்கம் அதிகரித்தாலும், அதன்பிறகு பொருள்களின் விலை குறைந்து பணவீக்கம் கட்டுக்குள் வரும் என்று கருதப்படுகிறது.
"ஜிஎஸ்டி-யால் இந்தியாவில் மொத்த உள்நாட்டு உற்பத்தி 1 முதல் 2 சதவீதம் வரை அதிகரிக்கும். அதே நேரத்தில் விலைவாசி உயர்வு கட்டுக்குள் வந்து பணவீக்கம் 2 சதவீதம் அளவுக்குக் குறையும்.
மேலும் ஜிஎஸ்டி வரியால் பொருள்களின் உற்பத்திச் செலவு குறையும். இதனால் மக்கள் அதிக அளவில் பொருள்களை வாங்கிப் பயனடைய முடியும். அதன் தொடர் விளைவாக நிறுவனங்களின் லாபம் அதிகரித்து அது முதலீடாக மாறும். இதைத் தொடர்ந்து நாட்டின் பொருளாதாரம் வளர்ச்சி வேகமெடுக்கும்' என்பது பொருளாதார வல்லுநர்களின் கருத்தாக உள்ளது.

சினிமா டிக்கெட் வரி குறைப்பு

திரைப்படத் துறையினரின் கோரிக்கையை ஏற்று ரூ.100 மற்றும் அதற்கு குறைவான சினிமா டிக்கெட்டுகளுக்கான ஜிஎஸ்டி 28 சதவீதத்தில் இருந்து 18 சதவீதமாகக் குறைக்கப்பட்டுள்ளது. 100 ரூபாய்க்கு கூடுதலான சினிமா டிக்கெட்டுக்கான வரி 28 சதவீதமாகத் தொடரும்.

கண் மை மீதான வரி குறைப்பு

கம்ப்யூட்டர் பிரிண்டர்கள், கண் மை ஆகியவற்றுக்கான வரி 28 சதவீதத்தில் இருந்து 18 சதவீதமாகக் குறைக்கப்பட்டுள்ளது.

சிறார், மாணவர்களுக்கு சலுகை

சிறார்கள் வண்ணம் தீட்டப் பயன்படுத்தும் ஓவியப் புத்தகங்களுக்கு முழு வரி விலக்கு அளிக்கப்படுகிறது. முன்பு இதற்கு 12 சதவீத ஜிஎஸ்டி அறிவிக்கப்பட்டிருந்தது. மாணவ, மாணவியர் பயன்படுத்தும் பள்ளி புத்தகப் பைகளுக்கான ஜிஎஸ்டி 18 சதவீதமாகக் குறைக்கப்பட்டுள்ளது.

இன்சுலினுக்கு 5% வரி

சர்க்கரை நோயாளிகள் பயன்படுத்தும் இன்சுலின் மருந்துக்கான வரி 5 சதவீதமாகக் குறைக்கப்பட்டுள்ளது. முன்பு இன்சுலினுக்கு 12 சதவீத வரி அறிவிக்கப்பட்டிருந்தது. அதேபோல அகர்பத்திக்கான வரி 5 சதவீதமாக குறைக்கப்பட்டுள்ளது.

உணவு வகைகள்

பாக்கெட்டுகளில் அடைக்கப்பட்டு விற்பனை செய்யப்படும் சிலவகைப் பழங்கள், காய்கறிகள், உணவுப் பொருள்கள், ஊறுகாய் வகைகள், கடுகில் இருந்து தயாரிக்கப்படும் சாஸ் மற்றும் ஜாம் ஆகியவற்றுக்கான ஜிஎஸ்டி 18 சதவீதத்தில் இருந்து 12 சதவீதமாகக் குறைக்கப்பட்டுள்ளது. முந்திரிப் பருப்புக்கான வரி 5 சதவீதமாகக் குறைந்துள்ளது. முன்பு இது 12 சதவீதமாக இருந்தது.

பிளாஸ்டிக் தார்ப்பாய், டிராக்டர் உதிரி பாகங்கள், சிறிய கத்தி, ஸ்பூன் உள்ளிட்ட சமையலறைப் பொருள்கள், உடற்பயிற்சி தொடர்பான புத்தகங்கள் ஆகியவற்றுக்கும் வரி குறைக்கப்பட்டுள்ளது.

வேலைவாய்ப்பு அதிகரிக்கும்

ஜவுளித் துறை, வைரம் பட்டை தீட்டுதல், தோல் பதனிடுதல், நகைத்தொழில், அச்சுத் தொழில் ஆகியவற்றில் ஒப்பந்தம் மூலம் பணிகளை (ஜாப் ஒர்க்) செய்து தருபவர்களுக்கு ஜிஎஸ்டி வரி 5 சதவீதமாகக் குறைக்கப்பட்டுள்ளது. முன்பு இது 18 சதவீதமாக அறிவிக்கப்பட்டிருந்தது. இந்த சலுகை மூலம் இத்துறையில் பணி ஒப்படைப்புகள் அதிகரித்து வேலைவாய்ப்பு பெருகும்.

வர்த்தகர்களுக்கும் சலுகை

ஆண்டுக்கு ரூ.75 லட்சம் வரை வருவாய் ஈட்டக் கூடிய வர்த்தகர்கள், உற்பத்தியாளர்கள், உணவக உரிமையாளர்கள் முறையே 1, 2, 5 சதவீத ஜிஎஸ்டி வரி செலுத்த வேண்டும். இதற்கு முன்பு ஆண்டுக்கு ரூ.50 லட்சம் வருவாய் இருந்தால் கூட இந்த அளவுக்கு வரி செலுத்த வேண்டும் என்று அறிவிக்கப்பட்டிருந்தது.

பரிசீலனையில்...

மாநில அரசுகளிடம் இருந்து கருத்துகளைப் பெற்ற பிறகு, பெட்ரோல் மற்றும் பேட்டரி மூலம் இயங்கும் "ஹைபிரிட்' வாகனங்களுக்கான வரியைக் குறைப்பது குறித்து மறுபரிசீலனை செய்யப்படும்.