புதுதில்லி: பிரபல ஹிந்தி தொலைக்காட்சி ஒன்றின் நகைச்சுவை நிகழ்ச்சி ஒன்றில் பங்கேற்ற போட்டியாளர் ஒருவர், பிரதமர் மோடியை 'மிமிக்ரி' செய்யக் கூடாது என்று எச்சரிக்கப்பட்ட சம்பவம் நிகழ்ந்துள்ளது.
ராஜஸ்தானைச் சேர்ந்தவர் ஷ்யாம் ரங்கீலா. இவர் பிரபல ஹிந்தி தொலைக்காட்சியான ஸ்டார் ப்ளஸில் நடைபெற்று வரும் 'தி கிரேட் இந்தியன் லாஃபர் சேலஞ்' நிகழ்ச்சியில் போட்டியாளாராக பங்கு பெற்றார். இந்த நிகழ்ச்சியில் பாலிவூட் நடிகர் அக்ஷய் குமார் சிறப்பு நடுவர் என்பது குறிப்பிடத்தக்கது. அங்கு நடைபெற்றதாகக் கூறப்படும் சம்பவம் பற்றி அவர் கூறியதாவது:
என்னுடைய மிமிக்ரி திறமையின் காரணமாக நான் அந்த நிகழ்ச்சியில் பங்குபெறும் வாய்ப்பினை பெற்றேன்.ஆனால அங்கு என்னுடைய முதல் நிகழ்ச்சியின் பொழுது மோடி மற்றும் ராகுல் இருவரையும் போல பேசி மிமிக்ரி செய்திருந்தேன்.
ஆனால் வேறு ஏதாவது செய்து காட்டுமாறு நான் கேட்டுக் கொள்ளப்பட்டேன்.பின்னர் நான் மோடி குறித்து மிமிக்ரி எதுவும் செய்யக் கூடாது என்றும், வேண்டுமானால் ராகுல் காந்தி பற்றி மிமிக்ரி செய்யலாம் என்றும் கூறப்பட்டது. நான் வேறு ஒரு நிகழ்ச்சிக்கான ஸ்க்ரிப்ட்டை உருவாக்கி கொண்டிருந்த பொழுது, மீண்டும் ஒரு முறை ராகுல் பற்றியும் மிமிக்ரி செய்யக் கூடாது என்று அறிவுறுத்தப்பட்டேன்.
இறுதியில் நான் உருவாக்கிய ஸ்க்ரிப்ட்டினை, இரண்டு நாட்கள் மட்டுமே செய்த ஒத்திகையோடு, எனது சொந்த குரலில் பேசினேன். ஆனால் நிகழ்ச்சியில் இருந்து வெளியேற்றப்பட்டேன். இத்தகைய நிகழ்ச்சி ஒன்றில் பங்கேற்க வேண்டும் என்பது என்னுடைய மிகப்பெரிய கனவு; ஆனால் இறுதியில் அது பெரிய கொடுங்கனவாக மாறி விட்டது.
இவ்வாறு ஷ்யாம் தெரிவித்தார்.
இந்த நிகழ்ச்சியின் முன்னாள் நடுவராக இருந்த மல்லிகா துவா, அங்கு ஒளிப்பதிவுக் கூடத்தில் அவருக்கும் அக்ஷய் குமாருக்கும் இடையே நடைபெற்ற உரையாடல் ஒன்றின் வீடியோவினை மல்லிகா வெளியிட்டதை தொடர்ந்து இந்த விவகாரம் வெளிச்சத்துக்கு வந்துள்ளது.
