ஐபிஎல் பிளேஆஃப்-புக்குத் தகுதி பெறுவதற்காக எல்லா அணிகளும் தொடர்ந்து போட்டியிட்டு வருகின்றன.
இதில் ஹைதராபாத், சென்னை, பஞ்சாப் ஆகிய அணிகள் தகுதி பெறுவதற்குப் பிரச்னையே இல்லை.
ஏனெனில் ஹைதராபாத் அணி மீதமுள்ள 5 ஆட்டங்களில் ஒரு ஆட்டத்தில் வென்றால் போதும். 8 வெற்றிகளுடன் 16 புள்ளிகளோடு பிளேஆஃப்-புக்குச் சென்றுவிடும்.
சென்னை அணி மீதமுள்ள நான்கு ஆட்டங்களில் ஒரு ஆட்டத்தில் வென்றால் போதும். 8 வெற்றிகளுடன் 16 புள்ளிகளோடு பிளேஆஃப்-புக்குச் சென்றுவிடும்.
பஞ்சாப் அணி மீதமுள்ள 5 ஆட்டங்களில் இரண்டு ஆட்டங்களில் வென்றால் போதும். 8 வெற்றிகளுடன் 16 புள்ளிகளோடு பிளேஆஃப்-புக்குச் சென்றுவிடும்.
இந்த மூன்று அணிகளும் பிளேஆஃப் செல்ல அதிகம் மெனக்கெட வேண்டியதில்லை. இதனால் பிளேஆஃப்-புக்கு 3 இடங்கள் உறுதிசெய்யப்பட்டுவிட்டன என்று இதைக் கொண்டு கூறமுடியும்.
மீதமுள்ள ஒரு இடத்துக்குத்தான் 4 அணிகள் தற்போது போட்டியிட்டு வருகின்றன. இன்றைய நிலவரப்படி 4 அணிகளுக்கும் வாய்ப்புள்ளது என்றுதான் சொல்லவேண்டும்.
நேற்று இரு முக்கியமான ஆட்டங்கள் நடைபெற்றன. இதில் மும்பை அணியின் வெற்றி ஐபிஎல் போட்டியை மேலும் சுவாரசியமாக்கியுள்ளது.
மும்பை இண்டியன்ஸ்-கொல்கத்தா நைட் ரைடர்ஸ் அணிகளுக்கு இடையிலான ஐபிஎல் 37-வது ஆட்டம் மும்பையில் ஞாயிற்றுக்கிழமை மாலை நடைபெற்றது. மும்பை இண்டியன்ஸ்-கொல்கத்தா நைட் ரைடர்ஸ் அணிகளுக்கு இடையிலான ஐபிஎல் 37-வது ஆட்டம் மும்பையில் ஞாயிற்றுக்கிழமை மாலை நடைபெற்றது. 20 ஓவர்கள் முடிவில் மும்பை அணி 4 விக்கெட் இழப்புக்கு 181 ரன்களை எடுத்திருந்தது. ஹார்திக் பாண்டியா 35 ரன்களுடனும், டூமினி 13 ரன்களுடனும் இறுதி வரை ஆட்டமிழக்காமல் இருந்தனர். கொல்கத்தா தரப்பில் சுனில் நரைன், ரஸ்ஸல் ஆகியோர் தலா 2 விக்கெட்டுகளை வீழ்த்தினர். 182 ரன்கள் எடுத்தால் வெற்றி என்ற இலக்குடன் களமிறங்கிய கொல்கத்தா அணி, 20 ஓவர்களில் 6 விக்கெட்டுகளை இழந்து 168 ரன்களையே எடுத்தது. இதனால் கொல்கத்தா 13 ரன்களில் தோல்வியைத் தழுவியது. மும்பை தரப்பில் ஹார்திக் 2 விக்கெட்டையும், மெக்ளேனகன், பும்ரா, க்ருணால், மார்கண்டே ஆகியோர் தலா 1 விக்கெட்டையும் வீழ்த்தினர். புள்ளிகள் பட்டியலில் கொல்கத்தா தொடர்ந்து 3-வது இடத்திலும், மும்பை 5-வது இடத்திலும் உள்ளன.
மற்றொரு ஆட்டத்தில், ராஜஸ்தான் அணியை 6 விக்கெட் வித்தியாசத்தில் பஞ்சாப் அணி வீழ்த்தி வெற்றி பெற்றது. அந்த அணியின் லோகேஷ் ராகுல் ஆட்டமிழக்காமல் 84 ரன்களைக் குவித்தார். முதலில் ஆடிய ராஜஸ்தான் அணி 9 விக்கெட் இழப்புக்கு 152 ரன்களை எடுத்தது. அந்த அணியின் ஜோஸ்பட்லர் அதிகபட்சமாக 51 ரன்களை எடுத்தார். பஞ்சாப் அணியின் முஜிப்பூர் ரஹ்மான் அபாரமாக பந்துவீசி 3 விக்கெட்டை வீழ்த்தினார். 18.4 ஓவர்களிலேயே 4 விக்கெட்டுகளை இழந்து 155 ரன்களை பஞ்சாப் அணி எடுத்தது. 3 சிக்ஸர், 7 பவுண்டரியுடன் 54 பந்துகளில் 84 ரன்களுடன் லோகேஷ் ராகுலும், 23 ரன்களுடன் ஸ்டாய்னிஸும் இறுதிவரை ஆட்டமிழக்காமல் அணியை வெற்றிக்கு அழைத்துச் சென்றனர். ராஜஸ்தான் தரப்பில் கெüதம், ஆர்ச்சர், ஸ்டோக்ஸ், அனுரீத் சிங் ஆகியோர் தலா 1 விக்கெட்டை வீழ்த்தினர். இந்த வெற்றியின் மூலம் பிளேஆஃப் அருகில் சென்றுள்ளது பஞ்சாப் அணி.
தில்லி அணி 10 ஆட்டங்களில் மூன்றில் மட்டுமே வெற்றி பெற்றுள்ளது. அந்த அணி மீதமுள்ள நான்கு ஆட்டங்களை வென்றாலும் 14 புள்ளிகளுடன் பிளேஆஃப்-புக்குத் தகுதி பெறுவது மிகக்கடினம். அதுவும் அந்த அணியின் நெட்ரன்ரேட் -0.411 என்று மோசமாக உள்ளது. உலக அதியசம் ஏதாவது நிகழ்ந்தால் மட்டுமே தில்லி அணியால் பிளேஆஃப்-புக்குத் தகுதி பெறமுடியும்.
கொல்கத்தா மீதமுள்ள 4 ஆட்டங்களில் 3-ல் வென்றால் பிளேஆஃப்-புக்குச் சென்றுவிடும். 4 அணிகளில் இந்த அணிக்கு மட்டுமே அதிக வாய்ப்புள்ளது. ஒரு ஆட்டத்தில் தோற்றாலும் பரவாயில்லை என்கிற நிலைமை உண்டு.
ஆனால் மும்பை, பெங்களூர், ராஜஸ்தான் ஆகிய அணிகள் மீதமுள்ள அனைத்து ஆட்டங்களையும் வென்றால் மட்டுமே பிளேஆஃப்-புக்குத் தகுதி பெறமுடியும். இது கடினமானது என்றாலும் இதற்கு முன்பு சென்னை, பெங்களூர், மும்பை ஆகிய அணிகள் இதுபோன்ற ஒரு சவாலைக் கடந்து வந்து பிளேஆஃப்-புக்குத் தகுதிப் பெற்றுள்ளன. எனவே இந்த மூன்று அணிகளுக்கும் இன்னமும் வாய்ப்புண்டு என்று உறுதியாகக் கூறமுடியும்.
கொல்கத்தா, மும்பை, பெங்களூர், ராஜஸ்தான்... இந்த நான்கு அணிகளில் எது நான்காம் இடத்தைப் பிடிக்கப்போகிறது? பார்க்கலாம்...
