டாக்கா: இங்கிலாந்துக்கு எதிராக இன்று தொடங்கிய இரண்டாவது டெஸ்ட் போட்டியின் முதல் இன்னிங்சில் வங்கதேசம் 220 ரன்களுக்கு அனைத்து விக்கெட்டுகளையும் இழந்தது.
டாஸ் வென்ற வங்கதேசம் முதலில் பேட் செய்தது. துவக்க ஆட்டக்காரர் தமிம் இக்பால் சிறப்பாக விளையாடி 147 பந்துகளில் 12 பவுண்டரிகளுடன் 104 ரன்கள் எடுத்து மொயின் அலி பந்தில் ஆட்டமிழந்தார். அவருக்கு அடுத்தபடியாக மொமினுல் ஹக் 111 பந்துகளில் 10 பவுண்டரிகளுடன் 66 ரன்கள் எடுத்த இவரும் மொயின் அலி பந்தில் பவுல்டு ஆகி வெளியேறினார். இவருக்கு பின்னால் வந்த யாரும் சரியாக விளையாடாமல் அடுத்தடுத்து ஆட்டமிழந்தனர். இதனையடுத்து 41-வது ஓவரிலிருந்து 9 விக்கெட்டுகளை மடமடவென இழந்து அடுத்த 22.5 ஓவர்களில் 220 ரன்களுக்குச் சுருண்டது வங்கதேசம்.
இங்கிலாந்து தரப்பில் மொயின் அலி 57 ரன்களுக்கு 5 விக்கெட்டுகளைக் கைப்பற்றினார். வோக்ஸ் அருமையாக வீசி 3 விக்கெட்டுகளையும் ஸ்டோக்ஸ் மீண்டும் 11 ஓவர்களில் வெறும் 13 ரன்களையே கொடுத்து 2 விக்கெட்டுகளையும் கைப்பற்றினார்.
ஒரு கட்டத்தில் 171/1 என்ற வலுவான நிலையில் இருந்த வங்கதேசம் அடுத்த 49 ரன்களில் 9 விக்கெட்டுகளை பறிகொடுத்து 220 ரன்களுக்குச் சுருண்டது குறிப்பிடத்தக்கது.
பின்னர் இங்கிலாந்து தனது முதல் இன்னிங்க்ஸை துவக்கியது. ஆட்ட நேர முடிவில் இங்கிலாந்து மூன்று விக்கெட்டுகளை இழந்து 50 ரன்கள் எடுத்து திணறி வருகிறது. குக் (14), டக்கெட் (7), பலன்ஸ் (9) ஆகியோர் ஆட்டம் இழந்தனர். ஜோ ரூட் 15 ரன்களுடனும் , மொயின் அலி 2 ரன்களுடனும் களத்தில் உள்ளனர்.
வங்கதேச தரப்பில் ஆஃப் ஸ்பின்னர் மெஹதி ஹசன் இரண்டு விக்கெட்டுகளையம், ஷாகிப் அல் ஹசன் ஒரு விக்கெட்டையும் கைப்பற்றினார்.