மியாமி மாஸ்டர்ஸ் டென்னிஸ் போட்டியின் ஆடவர் ஒற்றையர் இறுதிச் சுற்றில் ஸ்விட்சர்லாந்தின் ரோஜர் ஃபெடரர் ஸ்பெயினின் ரஃபேல் நடாலை வீழ்த்தி சாம்பியன் பட்டம் வென்றார்.
அமெரிக்காவின் மியாமி நகரில் நடைபெற்ற இந்தப் போட்டியில் நடைபெற்ற இறுதிச்சுற்றில் ரோஜர் ஃபெடரர், 6-3, 6-4 என்ற நேர் செட்களில் நடாலை வீழ்த்தி சாம்பியன் பட்டம் வென்றார். மியாமி ஓபன் பட்டத்தை ஃபெடரர் 3-வது முறையாகக் கைப்பற்றியுள்ளார்.
மியாமி மாஸ்டர்ஸ் போட்டியில் 5-வது முறையாக இறுதிச் சுற்றுக்கு முன்னேறிய நடால், இதுவரை இங்குப் பட்டம் வென்றதில்லை.
இந்த ஆண்டில் இவர்கள் இருவரும் மோதிய 2-வது இறுதிச் சுற்று இது. முன்னதாக கடந்த ஜனவரியில் நடைபெற்ற ஆஸ்திரேலிய ஓபன் இறுதிச் சுற்றில் ஃபெடரரும், நடாலும் மோதினர். அதிலும் ஃபெடரர்தான் வெற்றி பெற்றார். ஒட்டுமொத்தத்தில் நடாலும், ஃபெடரரும் நேருக்கு நேர் மோதிய 37-வது ஆட்டம் இது. இதில் ஃபெடரர் 14 முறையும் நடால் 23 முறையும் வென்றுள்ளார்கள்.
மியாமி பட்டம் ஃபெடரரின் 91-வது பட்டமாகும். தரவரிசையில் 4-ம் இடத்தில் இருக்கும் ஃபெடரர், முதல் இடத்தைப் பிடிக்கப் போராடுவேன் என்று கூறியுள்ளார். காயத்தினால் சில காலம் விளையாடாமல் இருந்த ஃபெடரர், இந்த வருடம் மட்டும் மூன்று பட்டங்களை வென்றுள்ளார். இந்த வருடம் விளையாடிய 20 ஆட்டங்களில் 19-ல் வெற்றிபெற்றுள்ளார்.