மான்ட்ரியால் மாஸ்டர்ஸ் டென்னிஸ் போட்டியில் ஸ்விட்சர்லாந்தின் ரோஜர் ஃபெடரர், ஜெர்மனியின் அலெக்சாண்டர் ஸ்வெரேவ் ஆகியோர் இறுதிச் சுற்றுக்கு முன்னேறியுள்ளனர்.
கனடாவின் மான்ட்ரியால் நகரில் இந்தப் போட்டி நடைபெற்று வருகிறது. இதில் ஞாயிற்றுக்கிழமை நடைபெற்ற அரையிறுதியில் போட்டித் தரவரிசையில் 2-ஆவது இடத்தில் இருக்கும் ரோஜர் ஃபெடரர் 6-3, 7-6 (5) என்ற நேர் செட்களில் நெதர்லாந்தின் ராபின் ஹேஸியைத் தோற்கடித்தார்.
இதன்மூலம் மான்ட்ரியால் மாஸ்டர்ஸ் போட்டியில் 6-ஆவது முறையாக இறுதிச் சுற்றுக்கு முன்னேறியிருக்கும் ரோஜர் ஃபெடரர், அது குறித்து பேசுகையில், "இங்கு மீண்டும் இறுதிச்சுற்றுக்கு முன்னேறியிருப்பது மகிழ்ச்சியளிக்கிறது' என்றார்.
மற்றொரு அரையிறுதியில் போட்டித் தரவரிசையில் 4-ஆவது இடத்தில் இருக்கும் ஜெர்மனியின் அலெக்சாண்டர் 6-4, 7-5 என்ற நேர் செட்களில் கனடாவின் டெனிஸ் ஷபோவெலாவை தோற்கடித்தார்.
இதன்மூலம் ஸ்பெயினின் ரஃபேல் நடால், ஆர்ஜென்டீனாவின் ஜுவான் மார்ட்டின் டெல் போட்ரோ ஆகியோருக்கு அதிர்ச்சித் தோல்வியளித்த ஷபோவெலாவின் ஆதிக்கம் முடிவுக்கு வந்தது.
ஆட்டம் முடிந்த பிறகு பேசிய ஷபோவெலாவ், "கடந்த 5 நாள்களில் எனது டென்னிஸ் வாழ்க்கை முற்றிலும் மாறியிருக்கிறது' என்றார்.
இறுதிச் சுற்றில் ரோஜர் ஃபெடரரும், அலெக்சாண்டர் ஸ்வெரேவும் மோதுகின்றனர். இதுவரை இவர்கள் இருவரும் 3 முறை நேருக்கு நேர் மோதியுள்ளனர். அவையனைத்திலும் ரோஜர் ஃபெடரரே வெற்றி கண்டுள்ளார். அதனால் இந்தப் போட்டியிலும் ஃபெடரரே சாம்பியன் பட்டம் வெல்வார் என எதிர்பார்க்கப்படுகிறது.