மலேசிய மாஸ்டர்ஸ் பாட்மிண்டன்: காலிறுதியில் சாய்னா, ஜெயராம்

மலேசியா மாஸ்ட்ர்ஸ் கிராண்ட் ஃப்ரீ பாட்மிண்டன் போட்டியில் இந்தியாவின் சாய்னா நெவால், அஜய் ஜெயராம் ஆகியோர் தங்களது பிரிவில் காலிறுதிச் சுற்றுக்கு முன்னேறினர்.
முன்னதாக நடைபெற்ற ஆட்டத்தில் இந்தோனேஷியாவின் ஹன்னா ரமாதினியை எதிர்கொண்ட சாய்னா, 21-17, 21-12 என்ற செட் கணக்கில் வெற்றி பெற்றார். இருவருக்கும் இடையேயான ஆட்டம் 42 நிமிடங்களில் முடிவுக்கு வந்தது. சாய்னா தனது காலிறுதியில், போட்டித் தரவரிசையில் 8-ஆவது இடத்தில் இருக்கும் இந்தோனேஷியாவின் ஃபிட்ரியானி ஃபிட்ரியானியை சந்திக்கிறார்.
அதேபோல், போட்டித் தரவரிசையில் 6-ஆவது இடத்தில் இருக்கும் அஜய் ஜெயராம், சீன தைபேவின் ஸுயேஹ் ஸுவானை எதிர்கொண்டார். இதில் ஜெயராம் 21-12, 15-21, 21-15 என்ற செட் கணக்கில் வென்றார். ஜெயராம் தனது காலிறுதியில் இந்தோனேஷியாவின் அன்டோணி சினிசுகா கிங்டிங்கை எதிர்கொள்கிறார்.
ஆடவர் இரட்டையர் பிரிவில் மானு அத்ரி/சுமீத் ரெட்டி ஜோடி 17-21, 21-18, 12-21 என்ற செட் கணக்கில் இந்தோனேஷியாவின் ஹென்ட்ரா அப்ரிடா/மார்கிஸ் கிடோ ஜோடியிடம் வீழ்ந்தது.
மகளிர் இரட்டையர் பிரிவில் இந்தியாவின் அபர்னா பாலன்/பிரஜக்தா சாவந்த் இணை, 18-21, 14-21 என்ற செட் கணக்கில் சீனதைபேவின் சியாங் காய்/ஹங் ஷீஹ் ஹான் இணையிடம் வீழ்ந்தது.
கலப்பு இரட்டையரில் மானு அத்ரி/ஜுவாலா கட்டா ஜோடி, 18-21, 10-21 என்ற செட் கணக்கில் இந்தோனேஷியாவின் டான்டோவி அஹ்மத்/கிளோரியா வித்ஜாஜா இணையிடம் வீழ்ந்தது.