காலிறுதிக்கு முந்தைய சுற்றில் முர்ரே, ஃபெடரர்

ஆஸ்திரேலிய ஒபன் டென்னிஸ் போட்டியில் உலகின் முதல் நிலை வீரரான பிரிட்டனின் ஆன்டி முர்ரே, சுவிட்ஸர்லாந்தின் ரோஜர் ஃபெடரர் ஆகியோர் காலிறுதிக்கு முந்தைய சுற்றுக்கு முன்னேறினர்.
ஆடவர் ஒற்றையர் பிரிவில் முர்ரே தனது 3-ஆவது சுற்றில், உலகின் 32-ஆம் நிலை வீரரான அமெரிக்காவின் சாம் குவெரியுடன் மோதினார். இருவருக்கும் இடையே 2 மணி நேரம் நடைபெற்ற விறுவிறுப்பான ஆட்டத்தின் முடிவில் 6-4, 6-2, 6-4 என்ற நேர் செட்களில் முர்ரே வெற்றி பெற்றார்.
முர்ரே தனது காலிறுதிக்கு முந்தைய சுற்றில் ஜெர்மனியின் மிஸ்சா ஸுவெரெவை சந்திக்க உள்ளார்.
இதனிடையே நடைபெற்ற மற்றொரு 3-ஆவது சுற்றில் செக். குடியரசின் தாமஸ் பெர்டிச்சை சந்தித்தார் ஃபெடரர். இந்த ஆட்டத்தில் 6-2, 6-4, 6-4 என்ற நேர் செட்களில் ஃபெடரர் வென்றார். அடுத்து நடைபெறும் முர்ரே-மிஸ்சா இடையேயான மோதலில் வெல்பவர், ஃபெடரருடன் மோத உள்ளார்.
மற்றொரு ஆட்டத்தில் சுவிட்ஸர்லாந்தின் ஸ்டான் வாவ்ரிங்கா வெற்றி பெற்று காலிறுதிக்கு முந்தைய சுற்றுக்கு முன்னேறினார். அந்த ஆட்டத்தில் செர்பியாவின் விக்டர் டிராய்கியை எதிர்கொண்ட வாவ்ரிங்கா, 3-6, 6-2, 6-2, 7-6(7) என்ற செட் கணக்கில் அவரை வீழ்த்தினார்.
அதேபோல், ஸ்லோவேகியாவின் லூகாஸ் லாக்கோவை 6-4, 6-4, 6-4 என்ற நேர் செட்களில் வீழ்த்தினார் ஜப்பானின் கெய் நிஷிகோரி. பிரான்ஸின் ஜோ வில்ஃப்ரைடு சோங்கா தனது 3-ஆவது சுற்றில் அமெரிக்காவின் ஜேக் சாக்கை 7-6(4), 7-5, 6-7(8), 6-3 என்ற செட் கணக்கில் வீழ்த்தினார்.
சானியா முன்னேற்றம்

மகளிர் இரட்டையர் பிரிவில் இந்தியாவின் சானியா மிர்சா/ செக். குடியரசின் பார்போரா ஸ்டிரைக்கோவா ஜோடி காலிறுதிக்கு முந்தைய சுற்றுக்கு முன்னேறியுள்ளது.
முன்னதாக, போட்டித் தரவரிசையில் 4-ஆவது இடத்தில் இருக்கும் இந்த ஜோடி, ஆஸ்திரேலியாவின் சமந்தா ஸ்டோசர்/ சீனாவின் ஷுவாய் ஸாங் இணையை 6-1, 6-4 என்ற செட் கணக்கில் வீழ்த்தியது.
சானியா-பார்போரா ஜோடி, தங்களது காலிறுதிக்கு முந்தைய சுற்றில் ஜப்பானிய ஜோடியான எரி ஹோஸுமி/ மியு காட்டோவை சந்திக்க உள்ளது.
போபண்ணா ஜோடி தோல்வி: இதனிடையே, ஆடவர் இரட்டையர் பிரிவில் இந்தியாவின் ரோஹன் போபண்ணா/ உருகுவேவின் பாப்லோ கியூவாஸ் ஜோடி தனது 3-ஆவது சுற்றில் தோல்வி கண்டு வெளியேறியது.
ஆஸ்திரேலியாவின் அலெக்ஸ் போல்ட்/ பிராட்லி மெளஸ்லி ஜோடியை சந்தித்த இந்த இணை, 6-2, 6-7(2), 4-6 என்ற செட் கணக்கில் வீழ்ந்தது.
கெர்பர் வெற்றி

ஆஸ்திரேலிய ஓபன் டென்னிஸ் போட்டியின் மகளிர் ஒற்றையர் பிரிவு 3-ஆவது சுற்றில், உலகின் முதல் நிலை வீராங்கனையான ஜெர்மனியின் ஏஞ்சலிக் கெர்பர், செக். குடியரஸின் கிறிஸ்டினா பிலிஸ்கோவாவை வீழ்த்தி காலிறுதிக்கு முந்தைய சுற்றுக்கு முன்னேறினார்.
இருவருக்கும் இடையே விறுவிறுப்பாக 55 நிமிடங்கள் நடைபெற்ற ஆட்டத்தின் முடிவில் நடப்புச் சாம்பியனான கெர்பர் 6-0, 6-4 என்ற செட் கணக்கில் கிறிஸ்டினாவை வென்றார்.
கெர்பர் தனது காலிறுதிக்கு முந்தைய சுற்றில் அமெரிக்காவின் கோகோ வான்டேவேகை சந்திக்கிறார். முன்னதாக கனடாவின் இயூஜின் பெளச்சார்டை எதிர்கொண்ட வான்டேவேக், 6-4, 3-6, 7-5 என்ற செட் கணக்கில் அதில் வெற்றி பெற்றார்.
மற்றொரு ஆட்டத்தில் லாத்வியாவின் அனஸ்தாஸியா செவஸ்டோவாவை எதிர்கொண்ட ஸ்பெயினின் கார்பின் முகுருஸா, 6-4, 6-2 என்ற நேர் செட்களில் வெற்றி கண்டார். அமெரிக்காவின் வீனஸ் வில்லியம்ஸ் தனது 3-ஆவது சுற்றில் 6-1, 6-0 என்ற செட் கணக்கில் சீனாவின் யிங் யிங் டுவானை வீழ்த்தினார்.
அதேபோல், செர்பியாவின் ஜெலினா ஜான்கோவிக்கை 6-4, 5-7, 9-7 என்ற செட் கணக்கில் வென்றார் ரஷியாவின் ஸ்வெட்லினா குஸ்நெட்úஸாவா.