சர்வதேச டெஸ்ட் கிரிக்கெட் தரவரிசையில் இந்திய வீரர் அஸ்வின் 2-ஆவது இடத்தில் இருந்து மூன்றாவது இடத்துக்கு தள்ளப்பட்டுள்ளார்.
ஜிம்பாப்வேக்கு எதிரான டெஸ்ட் போட்டியில் 11 விக்கெட்டுகளை வீழ்த்திய இலங்கை சுழற்பந்து வீச்சாளர் ரங்கனா ஹெராத் 2-ஆவது இடத்துக்கு முன்னேறியுள்ளார்.
39 வயதான ஹெராத் 81 டெஸ்ட் போட்டிகளில் விளையாடி 384 விக்கெட்டுகளை வீழ்த்தியுள்ளார். டெஸ்ட் போட்டியில் 8 முறை தலா 10 அல்லது அதற்கு மேற்பட்ட விக்கெட்டுகளை வீழ்த்தியிருக்கிறார்.
இந்திய சுழற்பந்து வீச்சாளர் ரவீந்திர ஜடேஜா தொடர்ந்து முதலிடத்தில் உள்ளார். ஆஸ்திரேலியாவின் ஜோஷ் ஹேஸில்வுட், இங்கிலாந்தின் ஆண்டர்சன் ஆகியோர் 4-ஆவது இடத்தில் உள்ளனர். இங்கிலாந்துக்கு எதிரான 2-ஆவது டெஸ்ட் போட்டியில் 6 விக்கெட்டுகளை வீழ்த்திய தென் ஆப்பிரிக்காவின் கேசவ் மகாராஜ் 12 இடங்கள் முன்னேறி 26-ஆவது இடத்தைப் பிடித்துள்ளார். இலங்கைக்கு எதிரான டெஸ்ட் போட்டியில் 9 விக்கெட்டுகளை வீழ்த்திய ஜிம்பாப்வே கேப்டன் கிரீம் கிரெமர் 20 இடங்கள் முன்னேறி 53-ஆவது இடத்தைப் பிடித்தார்.
பேட்ஸ்மேன்கள் தரவரிசையைப் பொறுத்தவரையில் தென் ஆப்பிரிக்காவின் ஹஷிம் ஆம்லா மீண்டும் முதல் 10 இடங்களுக்குள் முன்னேறியிருக்கிறார். முன்னதாக 13-ஆவது இடத்தில் இருந்த அவர், இப்போது 6 இடங்கள் முன்னேறி 7-ஆவது இடத்தைப் பிடித்துள்ளார்.
ஜிம்பாப்வேவின் கிரேக் இர்வின் 20 இடங்கள் முன்னேறி 40-ஆவது இடத்தையும், சிக்கந்தர் ராஸா 28 இடங்கள் முன்னேறி 48-ஆவது இடத்தையும் பிடித்துள்ளனர். இலங்கைக்கு எதிரான டெஸ்ட் போட்டியில் சதமடித்ததன் மூலம் தனது அதிகபட்ச தரவரிசையை எட்டியுள்ளார் சிக்கந்தர் ராஸா. ஜிம்பாப்வேக்கு எதிரான டெஸ்ட் போட்டியில் இலங்கையின் வெற்றிக்கு முக்கியக் காரணமாக இருந்த குணரத்னே 19 இடங்கள் முன்னேறி 79-ஆவது இடத்தைப் பிடித்துள்ளார்.
ஆஸ்திரேலிய கேப்டன் ஸ்டீவன் ஸ்மித், இங்கிலாந்து கேப்டன் ஜோ ரூட், நியூஸிலாந்து கேப்டன் கேன் வில்லியம்சன் ஆகியோர் முறையே முதல் 3 இடங்களில் உள்ளனர். இந்திய வீரர்களில் சேதேஷ்வர் புஜாரா 4-ஆவது இடத்திலும், விராட் கோலி 5-ஆவது இடத்திலும், கே.எல்.ராகுல் 10-ஆவது இடத்திலும் உள்ளனர். ஆல்ரவுண்டர்கள் தரவரிசையைப் பொறுத்தவரையில் வங்கதேசத்தின் ஷகிப் அல்ஹசன், இந்திய வீரர்கள் ரவீந்திர ஜடேஜா, அஸ்வின் ஆகியோர் முதல் மூன்று இடங்களை தக்கவைத்துக் கொண்டனர்.