உலக ஹாக்கி லீக் அரையிறுதிப் போட்டியின் காலிறுதியில் இந்திய அணி 2-3 என்ற கோல் கணக்கில் மலேசியாவிடம் தோல்வி கண்டது.
இதனால் அரையிறுதி வாய்ப்பை இழந்த இந்திய அணி, போட்டியிலிருந்து வெளியேறியது.
லண்டனில் நடைபெற்று வரும் இந்தப் போட்டியில் வியாழக்கிழமை நடைபெற்ற காலிறுதியில் இந்தியாவும், மலேசியாவும் மோதின. இதில் 19 மற்றும் 20-ஆவது நிமிடங்களில் பெனால்டி வாய்ப்பில் மலேசியா இரு கோல்களை அடித்தது.
இதையடுத்து சரிவிலிருந்து மீளப் போராடிய இந்திய அணி 24 மற்றும் 26-ஆவது நிமிடங்கள் கோலடித்தது. இந்த 2 கோலையும் ரமன்தீப் சிங் அடித்தார். இதனால் ஸ்கோர் சமநிலையை எட்டியது.
இதையடுத்து ஆட்டம் விறுவிறுப்பாக செல்ல, 48-ஆவது நிமிடத்தில் மலேசியாவுக்கு மீண்டும் பெனால்டி வாய்ப்பு கிடைத்தது. அதில் அந்த அணியின் ரஹிம் கோலடிக்க, அதுவே வெற்றிக்கோலாக அமைந்தது. கடந்த 2 மாதங்களில் தொடர்ந்து 2-ஆவது முறையாக மலேசியாவிடம் தோற்றுள்ளது இந்தியா.
அதேநேரத்தில் இந்தப் போட்டியில் அரையிறுதிக்கு முன்னேறிய மலேசியா, அடுத்த ஆண்டு நடைபெறவுள்ள உலகக் கோப்பை போட்டிக்கும் தகுதி பெற்றுவிட்டது. மலேசியா தனது அரையிறுதியில் ஆர்ஜென்டீனாவை சந்திக்கிறது.