இந்திய கிரிக்கெட் அணியின் தலைமை பயிற்சியாளர் பதவிக்கான விண்ணப்பங்களை பிசிசிஐ வியாழக்கிழமை முதல் வரவேற்றுள்ளது.
இதன்மூலம், சாம்பியன்ஸ் டிராபி போட்டியுடன் அனில் கும்ப்ளேவின் பதவிக் காலம் முடிவுக்கு வரும் நிலையில், அவருக்கு பொறுப்பு நீட்டிப்பு வழங்கப்படவில்லை என்று தெரிகிறது.
சாம்பியன்ஸ் டிராபி போட்டிக்காக இந்திய அணி இங்கிலாந்து புறப்பட்டுச் சென்றுள்ள நிலையில், பிசிசிஐ இந்த அறிவிப்பை மேற்கொண்டுள்ளது.
தலைமை பயிற்சியாளர் பதவிக்கு விண்ணப்பிக்க விரும்புவோர் வரும் 31-ஆம் தேதி வரையில் விண்ணப்பங்களை அனுப்பிவைக்கலாம் என்று தெரிவிக்கப்பட்டுள்ளது. விண்ணப்பிக்கும் நபர்களில் தகுதியானவர்களிடம் சச்சின் டெண்டுல்கர், செளரவ் கங்குலி, விவிஎஸ்.லக்ஷ்மண் ஆகியோர் அடங்கிய கிரிக்கெட் ஆலோசனைக் குழு (சிஏசி) நேர்க்காணல் நடத்தும்.
இதுதொடர்பாக பிசிசிஐ வெளியிட்டுள்ள அறிக்கையில், "நியாயமான மற்றும் வெளிப்படையான முறையில் பயிற்சியாளர் தேர்வு நடைபெறுவதை உறுதி செய்யும் வகையில், அதன் ஒட்டுமொத்த நடைமுறைகளையும் பிசிசிஐ நிர்வாகக் குழு (சிஓஏ) கண்காணிக்கும்' என்று தெரிவிக்கப்பட்டுள்ளது.
கும்ப்ளே மீது அதிருப்தி: அனில் கும்ப்ளே மீதான அதிருப்தியின் காரணமாகவே அவருக்கு பிசிசிஐ பதவி நீட்டிப்பு வழங்கவில்லை என்று கூறப்படுகிறது.
வீரர்களுக்கான ஒப்பந்த ஊதியம் மற்றும் தனது ஊதியத்தை அதிகளவு உயர்த்தித் தருமாறு அனில் கும்ப்ளே கேட்டுவருவதால் அவர் மீது பிசிசிஐக்கு அதிருப்தி ஏற்பட்டுள்ளது.
அனில் கும்ப்ளே பயிற்சியின் கீழ் சிறப்பாகச் செயல்பட்ட இந்திய அணி, இந்த சீசனில் உள்நாட்டில் நடைபெற்ற டெஸ்ட் தொடரில் 13 ஆட்டங்களில் 10 வெற்றி, ஒரு தோல்வியை பதிவு செய்துள்ளது. 2 ஆட்டங்கள் சமன் ஆகின.
அதேபோல், மேற்கிந்தியத் தீவுகளிலும் ஒரு டெஸ்ட் தொடரை முழுமையாக கைப்பற்றியது.
எனினும், வீரர்களுக்கான ஊதிய ஒப்பந்த உயர்வு உள்ளிட்ட அவரது பல்வேறு கோரிக்கைகள் பிசிசிஐ நிர்வாகத்தினருக்கு அதிருப்தியை ஏற்படுத்துவதாக இருந்துள்ளது.
இதுகுறித்து பிசிசிஐ அதிகாரி ஒருவர் கூறுகையில், "அனில் கும்ப்ளே தனக்காகவும், அணியின் வீரர்களுக்காகவும் பேரம் பேசி வருகிறார். இது ஏற்புடையது என்றாலும், நாளை அவருக்குப் பதில் வேறு ஒருவரை நியமிக்க பிசிசிஐ முடிவு செய்யும் பட்சத்தில், அவர் பேரம் பேசும் நிலையில் இருக்க மாட்டார். அவரது சில கோரிக்கைகள் விவரிக்க இயலாத வகையில் இருக்கின்றன' என்றார்.
ஒரு கேப்டனாக கோலிக்கு கூடுதல் பொறுப்புகள் இருப்பதால், அவருக்கான ஊதியத்தை 25 சதவீதம் அதிகரிப்பது, தலைமைப் பயிற்சியாளர் என்ற முறையில் தேர்வுக் குழுவிலும் தன்னை உறுப்பினராக்குவது என்பது போன்ற கும்ப்ளேவின் கோரிக்கைகள் பிசிசிஐ நிர்வாகத்தினருக்கு அதிருப்தியை ஏற்படுத்தியுள்ளதாக கூறப்படுகிறது.
இதனிடையே, தேர்வுக் குழுவில் தன்னை உறுப்பினராக்குவது என்ற அவரது கோரிக்கை, ஒரு தேர்வுக் குழுவில் 3 உறுப்பினர்கள் தான் இருக்க வேண்டும் என்ற லோதா குழு விதிகளுக்கு முரண்பட்டதாக இருக்கும் என்று தெரிவிக்கப்பட்டுள்ளது.
விதிகளின்படியே நடக்கிறது வாரியம்
தலைமை பயிற்சியாளர் தேர்வு விவகாரத்தில் பிசிசிஐ விதிகளின்படி நடப்பதாக இந்திய அணியின் கேப்டன் விராட் கோலி கூறியுள்ளார்.
இதுகுறித்து அவர் மேலும் கூறுகையில், "கடந்த காலங்களைப் போலவே இப்போதும் நடைமுறைகள் பின்பற்றப்படுகிறது. நான் அறிந்த வரையில் பிசிசிஐ விதிகளின்படி நடக்கிறது.
எனவே, முந்தைய தேர்வுகளுடன் ஒப்பிடுகையில் எந்தவொரு வித்தியாசமான நடைமுறையும் தலைமை பயிற்சியாளர் தேர்வில் தற்போது பின்பற்றப்படுவதாகத் தெரியவில்லை.
இதுதொடர்பாக எனக்கு அதிகத் தகவல்கள் தெரியவில்லை. ஏனெனில், அதில் முடிவுகள் மேற்கொள்ள அதற்கென தனியே குழு உள்ளது. அவர்கள் விதிகளின்படி நடக்கிறார்கள்.
அணியின் சிறப்பான செயல்பாட்டைப் பொருத்த வரையில், அது அணியில் உள்ள ஒவ்வொருவரின் பங்களிப்பின் மூலம் கிடைப்பதாகும்' என்றார்.
"மீண்டும் விண்ணப்பிக்கலாம்'
பிசிசிஐ செயலர் அமிதாப் செளதரி கூறுகையில், "இது வழக்கமான நடைமுறைதான். கும்ப்ளேவின் ஒப்பந்தம் ஜூன் 20-ஆம் தேதியுடன் நிறைவடைகிறது. எனவே, 21-ஆம் தேதி முதல் புதிய பயிற்சியாளரை பொறுப்பில் அமர்த்த வேண்டியுள்ளது.
அனில் கும்ப்ளேவின் செயல்பாட்டில் பிசிசிஐ-க்கு முழு திருப்தி உள்ளது என்பதை தெளிவுபடுத்துகிறோம். நடப்பு பயிற்சியாளர் என்ற முறையில் அவர் மீண்டும் தலைமை பயிற்சியாளர் பதவிக்கு விண்ணப்பிக்கலாம்' என்றார்.