ஸ்கோர்கள்: அருணாசல பிரதேசம் 138 & 36 (ரெக்ஸ் ராஜ்குமார் சிங் 10/11) , மணிப்பூர் 122 (அபிஜீத் 48, கோவிந்த் மிட்டல் 5/50, டக்ரா 4/25) & 55/0 (ஷுபம் செளகான் 32*)
மணிப்பூர் இளம் வீரர் ரெக்ஸ் ராஜ்குமார் சிங் புதிய சாதனை படைத்து கவனம் ஈர்த்துள்ளார்.
ஆனந்தபூரில் நடைபெற்ற கூச் பெஹர் யு-19 போட்டியில் அருணாசல பிரதேசத்துக்கு எதிரான ஆட்டத்தில் 9.5 ஓவர்கள் வீசி 11 ரன்கள் கொடுத்து எதிரணியின் அனைத்து விக்கெட்டுகளையும் எடுத்துள்ளார் ரெக்ஸ் சிங். அருணாச பிரதேச அணி ரெக்ஸ் சிங்கின் அசத்தலான பந்துவீச்சில் இரண்டாவது இன்னிங்ஸில் 36 ரன்களுக்குச் சுருண்டது. இதையடுத்து இந்த இலக்கை 10 விக்கெட்டுகள் வித்தியாசத்தில் வென்றது மணிப்பூர் அணி.
18 வயது இடக்கைப் பந்துவீச்சாளரான ரெக்ஸ் சிங்கின் 10 விக்கெட்டுகளில் ஐந்து விக்கெட்டுகள் க்ளீன் போல்ட் செய்ததன் மூலம் கிடைத்தன. மூன்றுமுறை ஹாட்ரிக் விக்கெட் எடுக்கும் வாய்ப்பு அவருக்குக் கிடைத்தது.
ரெக்ஸ் சிங் 10 விக்கெட்டுகள் எடுத்த ஆட்டத்தின் விடியோவை பிசிசிஐ வெளியிட்டுள்ளது. இதையடுத்து சமூகவலைத்தளங்களில் பலரும் இதைப் பகிர்ந்து வருகிறார்கள்.