இந்தியாவுக்கு எதிரான முதல் டெஸ்ட் போட்டியில் தென் ஆப்பிரிக்க அணி தடுமாற்றம் கண்டு வருகிறது. ஷமி, பூம்ரா ஆகியோர் சிறப்பாகப் பந்துவீசி இந்திய அணிக்குப் பக்கபலமாக உள்ளார்கள்.
இந்தியா - தென் ஆப்பிரிக்க அணிகளுக்கு இடையிலான முதல் டெஸ்ட் போட்டியில் முதல் இன்னிங்ஸில் தென் ஆப்பிரிக்கா 73.1 ஓவர்களில் 286 ரன்கள் எடுத்திருந்தது. அடுத்து ஆடிய இந்தியா, 73.4 ஓவர்களில் 209 ரன்களுக்கு ஆட்டமிழந்தது. பின்னர் 2-ஆவது இன்னிங்ஸைத் தொடங்கிய தென் ஆப்பிரிக்கா சனிக்கிழமை முடிவில் 20 ஓவர்களில் 2 விக்கெட் இழப்புக்கு 65 ரன்கள் எடுத்தது.
3-ஆவது நாள் ஆட்டம் மழையால் கைவிடப்பட்டது. இந்நிலையில் இன்று ஆட்டம் தொடங்கிய நிமிடம் முதல் இந்திய வேகப்பந்து வீச்சாளர்கள் அசத்தி வருகிறார்கள். அடுத்தடுத்து விக்கெட்டுகளை வீழ்த்தி தென் ஆப்பிரிக்க அணியினரைத் திணறவைத்தார்கள். முதலில் ஆம்லா 4 ரன்களில் ஷமி பந்துவீச்சில் அவுட் ஆனார். பிறகு ஷமி, ரபடாவை 5 ரன்களில் வெளியேற்றினார். இதன்பிறகு பூம்ரா தனது திறமையை நிரூபித்தார். அடுத்தடுத்து டுபிளெஸ்ஸிஸ் (0), குயின் டி காக் (8 ரன்கள்) ஆகியோரை சொற்ப ரன்களில் வெளியேற்றினார். அடுத்ததாக பிளாண்டர் ஷமி பந்துவீச்சில் டக் அவுட் ஆகி வெளியேறினார். இதனால் 95 ரன்களுக்குள் 7 விக்கெட்டுகளை இழந்தது தென் ஆப்பிரிக்கா.
தென் ஆப்பிரிக்க அணி 37 ஓவர்களில் 7 விக்கெட் இழப்புக்கு 109 ரன்கள் எடுத்து தடுமாறி வருகிறது. டி வில்லியர்ஸ் 29, மஹாராஜா 4 ரன்களுடன் களத்தில் உள்ளார்கள். 3 விக்கெட்டுகள் மீதமுள்ள நிலையில் அந்த அணி 186 ரன்கள் முன்னிலை பெற்றுள்ளது.