சாஹாவுக்கு இங்கிலாந்தில் தோள்பட்டை அறுவை சிகிச்சை

இந்திய கிரிக்கெட் வீரர் ரித்திமன் சாஹாவுக்கு தோள்பட்டை காயத்துக்கான அறுவை சிகிச்சை இங்கிலாந்தின் மான்செஸ்டர் நகரில் மேற்கொள்ளப்படுகிறது.
 33 வயதான மேற்குவங்க விக்கெட் கீப்பரான சாஹா தோளில் காயமடைந்தார். ஆனால் பெங்களூருவில் உள்ள தேசிய கிரிக்கெட் அகாதெமியில் அவருக்கு உரிய சிகிச்சை அளிக்கப்படாததால், நிலைமை மோசமடைந்து விட்டது என புகார்கள் எழுந்தன. இதனால் அவரால் இங்கிலாந்துக்கு எதிரான டெஸ்ட் தொடரிலும் பங்கேற்க முடியவில்லை.
 இந்நிலையில் சாஹாவின் உடல்நிலை குறித்து பிசிசிஐ வட்டாரங்கள் கூறியதாவது:
 இந்திய அணி நிர்வாகம் மற்றும் தேசிய கிரிக்கெட் அகாதெமியினருடன் ஆலோசித்து தான் சாஹாவுக்கு சிகிச்சை அளிக்கப்பட்டது. ஐபிஎல் போட்டிகளின் போது ஏற்பட்ட பெருவிரல் காயத்துக்காக சிகிச்சை செய்யப்பட்டது. மேலும் தோளில் ஏற்பட்ட காயத்துக்காக ஜூலை இறுதி அல்லது ஆகஸ்ட் மாத தொடக்கத்தில் மான்செஸ்டர் நகரில் டாக்டர் லென்னர்ட் பங்க் என்பவர் அறுவை சிகிச்சை செய்ய உள்ளார் எனத் தெரிவித்தன.