யுஎஸ் ஓபன் டென்னிஸ் போட்டி இறுதி ஆட்டத்தில் ஜூவான் மார்டின் டெல் போட்ரோவை வீழ்த்தி சாம்பியன் பட்டம் வென்றுள்ளார் ஜோகோவிச். இதன் மூலம் அவர் தனது 14-வது கிராண்ட்ஸ்லாம் பட்டத்தை வென்றுள்ளார்.
ஆண்டின் இறுதி கிராண்ட்ஸ்லாம் போட்டியான யுஎஸ் ஓபன் நியூயார்க் நகரில் நடைபெற்றது. இறுதி ஆட்டம் ஞாயிறு நள்ளிரவு நடைபெற்றது. இதில் முன்னணி வீரர் ஜோகோவிச், 6-3, 7-6 (4), 6-3 என நேர் செட்களில் தனது 14-வது கிராண்ட்ஸ்லாம் பட்டத்தையும் மூன்றாவது யு.எஸ். ஓபன் பட்டத்தையும் வென்றுள்ளார். அவர் இதுவரை ஆறு ஆஸ்திரேலிய ஓபன், ஒரு பிரெஞ்சு ஓபன், நான்கு விம்பிள்டன், மூன்று யு.எஸ். ஓபன் பட்டங்களை வென்றுள்ளார். ஃபெடரர் 20 கிராண்ட்ஸ்லாம் பட்டங்களையும் நடால் 17 கிராண்ட்ஸ்லாம் பட்டங்களை வென்று முன்னிலையில் உள்ளார்கள்.