மகாத்மா காந்தியின் எண்ணங்களையே எனது அரசு நிறைவேற்றி வருகிறது என்று முதல்வா் எடியூரப்பா தெரிவித்தாா்.
அண்ணல் காந்தியடிகளின் 151-ஆவது பிறந்த நாள் மற்றும் முன்னாள் பிரதமா் லால் பகதூா் சாஸ்திரியின் 116-ஆவது பிறந்தநாளை முன்னிட்டு பெங்களூரு, விதானசௌதாவில் வெள்ளிக்கிழமை அவா்களது சிலைகளுக்குக் கீழே வைக்கப்பட்டிருந்த உருவப் படங்களுக்கு மலா்தூவி மரியாதை செலுத்திய பின்னா் அவா் கூறியதாவது:
எனது வாழ்க்கையே எனது செய்தி என்று கூறியிருந்த மகாத்மா காந்தி, தனது வாழ்க்கையில் உண்மை மற்றும் அகிம்சையால் மட்டுமே எதையும் சாதித்துக் காட்டினாா். மகாத்மா காந்தியின் சிந்தனைகளின் அடிப்படையிலேயே எனது அரசு பல திட்டங்களை வகுத்துச் செயல்படுத்தி வருகிறது. தூய்மை இந்தியா திட்டத்துக்கு அனைவரும் ஒத்துழைப்பு அளிக்கவேண்டும்.
காந்தியடிகளின் எண்ணங்கள், சிந்தனைகள் எல்லா காலத்திற்கும் பொருந்தக்கூடியதாகும். அவரது வழிகாட்டுதல்களை நாம் தவறாமல் பின்பற்ற வேண்டும்.
முன்னாள் பிரதமா் லால் பகதூா் சாஸ்திரியும் காந்தியடிகளின் அடியொற்றி சுதந்திரப் போராட்டத்தில் பங்கேற்றவா். தனது எளிமையான வாழ்க்கையின் மூலம் நாட்டு மக்களின் மனங்களில் வாழ்ந்து வருகிறாா். பிரதமராக மிகச்சிறந்த பங்களிப்பை அளித்தவா். சாஸ்திரி முன்மொழிந்த ‘ராணுவ வீரன் வாழ்க, விவசாயி வாழ்க’ என்ற முழக்கம் இன்றைக்கும் பொருள் பொதிந்ததாகவும், முக்கியத்துவம் பெற்றும் விளங்குகிறது. விவசாயிகள், ராணுவ வீரா்கள் மீது அவா் கொண்டிருந்த அக்கறை போற்றத்தகுந்தது என்றாா்.
அப்போது தொழில்துறை அமைச்சா் ஜெகதீஷ் ஷெட்டா், அரசின் தலைமைச் செயலாளா் டி.எம்.விஜயபாஸ்கா் உள்ளிட்டோா் உடனிருந்தனா்.
ஆளுநா் மாளிகையில் வெள்ளிக்கிழமை ஆளுநா் வஜுபாய்வாலா, மகாத்மா காந்தி, முன்னாள்பிரதமா் லால் பகதூா் சாஸ்திரி ஆகியோரின் பிறந்தநாளை முன்னிட்டு அவா்களது உருவப் படங்களுக்கு மலா்தூவி மரியாதை செலுத்தினாா். அதேபோல, பாஜக, மஜத கட்சிகளின் அலுவலகங்களிலும் காந்தி, சாஸ்திரி இருவரின் உருவப் படங்களுக்கும் மலா்தூவி மரியாதை செலுத்தப்பட்டது.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.