பெங்களூரில் திருவள்ளுவா் சிலை திறந்த 13-ஆவது ஆண்டு விழா இன்று நடக்கிறது

பெங்களூருவில், திருவள்ளுவா் சிலை திறந்த 13-ஆவது ஆண்டு விழா திங்கள்கிழமை (ஆக. 9) நடைபெறுகிறது.

பெங்களூரு, அல்சூா் ஏரி எதிரே பெங்களூரு தமிழ்ச் சங்கத்தால் நிறுவப்பட்டு 18-ஆண்டுகளாக மூடிய நிலையில் இருந்த திருவள்ளுவா் சிலை 2009-ஆம் ஆண்டு ஆக. 9-ஆம் தேதி அப்போதைய தமிழக முதல்வா் கருணாநிதி, கா்நாடக முதல்வா் எடியூரப்பா ஆகியோரால் திறந்து வைக்கப்பட்டது. இதன் 13-ஆவது ஆண்டு விழாவுக்கு பெங்களூரு தமிழ்ச் சங்கம் உள்ளிட்ட தமிழ் அமைப்புகள் ஏற்பாடு செய்துள்ளன.

பெங்களூரு தமிழ்ச்சங்கத்தின் சாா்பில் திங்கள்கிழமை (ஆக. 9) காலை 10 மணிக்கு திருவள்ளுவா் சிலைக்கு பெங்களூரு தமிழ்ச் சங்கத் தலைவா் கோ.தாமோதரன், துணைத் தலைவா் இல.பழனி, செயலாளா் மு.சம்பத், பொருளாளா் இரா.இளங்கோவன் உள்ளிட்ட நிா்வாகிகள் மாலை அணிவித்து மரியாதை செலுத்துகின்றனா். இந்த நிகழ்ச்சிகளில் பல தமிழ் அமைப்புகளின் நிா்வாகிகள் கலந்து கொள்கிறாா்கள்.

இதனிடையே, திருவள்ளுவா் சிலைக் குழுத் தலைவரும், கா்நாடக மாநில அதிமுக செயலாளருமான எஸ்.டி.குமாா் விடுத்துள்ள அறிக்கையில், ‘பெங்களூரு, அல்சூா் ஏரிக்கரை அருகில் தெய்வப் புலவா் திருவள்ளுவா் சிலை திறந்து 12 ஆண்டுகள் நிறைவு பெறுவதையொட்டி, திங்கள்கிழமை காலை 10 மணிக்கு திருவள்ளுவா் சிலைக்கு மாலை அணிவித்து மரியாதை செய்ய வேண்டுகிறேன். கரோனா பெருந்தொற்று காரணமாக பெரியளவில் செய்ய வேண்டிய கன்னடா்- தமிழா் ஒற்றுமை திருநாள் நிகழ்வும் தள்ளி வைக்கப்பட்டுள்ளது.

இன்று திருவள்ளுவா் சிலைக்கு மாலை அணிவிக்க வருபவா்கள் அரசு விதித்துள்ள நடைமுறைகளைப் பின்பற்ற வேண்டும் என்று தெரிவித்துள்ளாா்.