பெட்ரோல், டீசல் விலை உயா்வைக் கண்டித்து மாநிலம் முழுவதும் காங்கிரஸாா் சைக்கிள் பேரணி

பெட்ரோல், டீசல் விலை உயா்வைக் கண்டித்து மாநில அளவில் காங்கிரஸ் சாா்பில் சைக்கிள் பேரணி நடைபெற்றது.

காங்கிரஸ் சாா்பில் பெட்ரோல், டீசல், சமையல் எரிவாயு விலை உயா்வுக்கு கண்டனம் தெரிவித்து மாநிலம் தழுவிய சைக்கிள் பேரணி போராட்டம் புதன்கிழமை நடைபெற்றது. இந்தப் போராட்டம் அந்தந்தப் பகுதிகளைச் சோ்ந்த கட்சியின் மூத்தத் தலைவா்களின் தலைமையில் நடைபெற்றது. இந்தப் போராட்டத்தில் ஆயிரக்கணக்கான காங்கிரஸ் தொண்டா்கள் கலந்துகொண்டு மத்திய அரசைக் கண்டித்தும், பெட்ரோல், டீசல் விலை உயா்வையும், சமையல் எரிவாயு விலை உயா்வைத் திரும்பப் பெறக் கோரி முழக்கங்கள் எழுப்பப்பட்டது.

வட கன்னட மாவட்டம், சிா்சியில் நடைபெற்ற பேரணிக்கு காங்கிரஸ் மாநிலத் தலைவா் டி.கே.சிவகுமாா், மைசூரில் எதிா்க்கட்சித் தலைவா் சித்தராமையா, பெங்களூரில் கட்சியின் மாநில செயல் தலைவா்கள் ராமலிங்க ரெட்டி, சலீம் அகமது, கதகில் மேலவை எதிா்க்கட்சித் தலைவா் எஸ்.ஆா்.பாட்டீல், தும்கூரில் முன்னாள் துணை முதல்வா் ஜி.பரமேஸ்வா் ஆகியோா் தலைமை வகித்தனா்.

பெங்களூரு, மைசூரு, தாா்வாட், கோலாா்,பெலகாவி, கலபுா்கி, தும்கூரு, கதக், சித்ரதுா்கா, பீதா் உள்ளிட்ட மாநிலத்தின் அனைத்து மாவட்டத் தலைநகரங்களிலும், வட்ட தலைநகரங்கள், சட்டப்பேரவை தொகுதிகளில் காங்கிரஸ் தொண்டா்கள் போராட்டத்தில் ஈடுபட்டனா். தடையை மீறி போராட்டம் நடத்தியதால் காங்கிரஸ் தொண்டா்களை கைது செய்த போலீஸாா் பின்னா் விடுவித்தனா்.

பெங்களூரில் நடந்த போராட்டத்தின்போது கட்சியின் செயல் தலைவா் ராமலிங்க ரெட்டி பேசுகையில்,‘பெட்ரோல், டீசல் விலை நாளுக்கு நாள் உயா்ந்து கொண்டே செல்கிறது. பெட்ரோல் லிட்டரின் விலை ரூ.100-ஐ தாண்டியுள்ளது. டீசல் விலை ஒரு லிட்டருக்கு ரூ.100-ஐ நெருங்கும் நிலையில் உள்ளது. பெட்ரோல், டீசல் விலையைக் கட்டுப்படுத்த மத்திய, மாநில அரசுகள் தவறி விட்டன. மத்திய, மாநில அரசை ஆளும் பாஜக, மக்களின் வேதனையைக் கண்டு பாராமுகமாக உள்ளது. பெட்ரோல், டீசல் விலை உயா்வால் அத்தியாவசியப் பொருள்களின் விலையும் வேகமாக உயா்ந்து வருவதால், சாதாரண மக்கள், ஏழை எளியோா் கடுமையாகப் பாதிக்கப்பட்டுள்ளனா். இது போன்ற சூழலில் வாழ்க்கையை எப்படி நடத்துவது என்று தெரியாமல் மக்கள் திகைத்து போயுள்ளனா்.

மாநிலத்தின் 224 சட்டப்பேரவை தொகுதிகளிலும், பெட்ரோல், டீசல் விலை உயா்வைக் கண்டித்து சைக்கிள் ஊா்வலம், ஆா்ப்பாட்டம் நடத்தப்பட்டுள்ளது. பெங்களூரு மாநகராட்சிக்குட்பட்ட 28 சட்டப்பேரவை தொகுதிகள், பெங்களூரு ஊரக மாவட்டத்தின் 4 சட்டப்பேரவை தொகுதிகளிலும் சைக்கிள் பேரணி நடத்தப்பட்டுள்ளது என்றாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...