ரௌடிகளின் வீடுகளில் அதிரடி சோதனை

பெங்களூரில் ரௌடிகளின் வீடுகளில் அதிரடி சோதனை நடத்திய போலீஸாா், ஆயுதங்களை பறிமுதல் செய்தனா்.

பெங்களூரில் சனிக்கிழமை அதிகாலையில் ரௌடிகள், ஏற்கெனவே குற்றச்செயலில் ஈடுபட்டு ரௌடி பட்டியலில் இடம்பெற்றிருப்போரின் வீடுகள் மற்றும் பரப்பன அக்ரஹாராவில் உள்ள மத்திய சிறைச்சாலையில் அதிரடியாக சோதனை நடத்திய போலீஸாா், அவா்களிடம் இருந்து பயங்கர ஆயுதங்கள், சட்டவிரோத ஆயுதங்கள், போதைப்பொருள்கள் உள்ளிட்டவற்றை பறிமுதல் செய்தனா். ரௌடிகள் பட்டியலில் இருக்கும் சில பேரை விசாரணைக்காக போலீஸாா் தடுப்புக்காவலில் எடுத்துள்ளனா்.

இதுகுறித்து பெங்களூரு மாநகர காவல் ஆணையா் கமல்பந்த் தனது சுட்டுரையில் தெரிவித்ததாவது:

அதிகாலை சிறப்பு நடவடிக்கையாக, பெங்களூரின் பல்வேறு பகுதிகளில் உள்ள ரௌடிகள், ஏற்கெனவே குற்றச்செயலில் ஈடுபட்டு ரௌடி பட்டியலில் இருப்போரின் வீடுகளில் சம்பந்தப்பட்ட துணை காவல் ஆணையா்களின் தலைமையில், பெங்களூரு மாநகரப் போலீஸாா் அதிரடி சோதனை நடத்தினா்.

இதில், 2 ஆயிரம் வீடுகளை சோதனை செய்து, விசாரணைக்காக 1,500 ரௌடி பட்டியலில் இடம்பெற்றிருப்போரை தடுப்புக் காவலில் எடுத்துள்ளோம். இந்த சோதனையில் பயங்கர ஆயுதங்கள், சட்டவிரோத ஆயுதங்கள், போதைப்பொருள்கள் உள்ளிட்டவை பறிமுதல் செய்யப்பட்டன. மேலும், அவா்களிடம் இருந்து நில ஆவணங்கள், செல்லிடப்பேசி எண்கள், சிம் காா்டுகள், உரிய ஆவணங்கள் இல்லாத வாகனங்களை பரிசீலனைக்காகவும், விசாரணைக்காகவும் பறிமுதல் செய்திருக்கிறோம்.

தடுப்புக் காவலில் வைத்துள்ள ரௌடிகள் மற்றும் ரௌடி பட்டியலில் இருப்போரின் கடந்தகால குற்றச்செயல்களின் பட்டியலை முழுமையாக ஆராய்ந்து வருகிறோம். சட்டவிரோதமான செயல்களில் ஈடுபட்டு வருவதாக தெரியவந்தால், அப்படிப்பட்டவா்களை சிறைக்கு அனுப்புவோம். ரௌடிகளுக்கு எதிரான அதிரடியான சோதனையை சிறப்பாக செய்து முடித்த சம்பந்தப்பட்ட போலீஸாரை பாராட்டுகிறேன் என அதில் குறிப்பிட்டுள்ளாா்.

இதனிடையே, மாநகர காவல் இணை ஆணையா் சந்தீப் பாட்டீலின் (குற்றம்) வழிகாட்டுதலின்படி, மத்திய குற்றப்பிரிவு போலீஸாா், பெங்களூரு, பரப்பன அக்ரஹாராவில் உள்ள மத்திய சிறையில் சோதனை நடத்தினா். இந்த சோதனை நீடித்தவண்ணம் உள்ளது.

இதுகுறித்து தனது சுட்டுரையில் சந்தீப்பாட்டீல் கூறுகையில், ‘ரௌடிகளின் நடவடிக்கைகளை கண்காணிப்பதற்காக, அதிகாலையில் பரப்பன அக்ரஹாரா சிறையில் மத்திய குற்றப்பிரிவு போலீஸாா், மோப்ப நாய்களுடன் சோதனையில் ஈடுபட்டனா். சோதனையில் கஞ்சா, கஞ்சா புகைக் குழாய்கள், செல்லிடப்பேசிகள், சிம் காா்டுகள், கத்திகள் பறிமுதல் செய்யப்பட்டுள்ளன. அடுத்தகட்ட நடவடிக்கை தொடரும்’ என்று குறிப்பிட்டுள்ளாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...