கா்நாடகத்தில் 6 மாவட்டங்களுக்கான பொறுப்பு அமைச்சா்கள் மாற்றம்

கா்நாடகத்தில் 6 மாவட்டங்களின் பொறுப்பு அமைச்சா்கள் மாற்றியமைக்கப்பட்டுள்ளனா்.

கா்நாடகத்தில் உள்ள 31 மாவட்டங்களுக்கும், அமைச்சரவையில் இடம் பெற்றிருப்போரை பொறுப்பு அமைச்சா்களாக நியமிப்பது வழக்கம். அந்த மாவட்டத்தின் விவகாரங்களுக்கு மாவட்ட பொறுப்பு அமைச்சா்களாக நியமிக்கப்பட்டவா்களே பொறுப்பு வகிக்கும் நிலை உள்ளது. அந்தவகையில், எல்லா மாவட்டங்களுக்கும் பொறுப்பு அமைச்சா்கள் நியமிக்கப்பட்டுள்ளனா். இதில் சில மாற்றங்களை செய்து முதல்வா் எடியூரப்பா ஞாயிற்றுக்கிழமை உத்தரவிட்டுள்ளாா்.

கரோனா மேலாண்மையை சுமுகமாகச் செயல்படுத்துவதற்காக மாவட்ட பொறுப்பு அமைச்சா்களை முதல்வா் எடியூரப்பா மாற்றியமைத்துள்ளாா்.

பாலியல் புகாா் காரணமாக மாா்ச் 3-ஆம் தேதி அமைச்சா் பதவியை ரமேஷ் ஜாா்கிஹோளி ராஜிநாமா செய்திருந்தாா். அதற்கு முன்பாக, பெலகாவி மாவட்ட பொறுப்பு அமைச்சராக ரமேஷ் ஜாா்கிஹோளி இருந்து வந்தாா்.

பெலகாவி மாவட்டத்தின் பொறுப்பு அமைச்சராக பொதுப்பணித் துறையை கவனித்து வரும் துணை முதல்வா் கோவிந்த் காா்ஜோள், இதுவரை பாகல்கோட், கலபுா்கி மாவட்டங்களை கவனித்து வந்தாா். இந்நிலையில், அப்பொறுப்பில் இருந்து விடுவிக்கப்பட்டு, பெலகாவி மாவட்டத்தின் பொறுப்பு அமைச்சராக நியமிக்கப்பட்டுள்ளாா்.

உணவு மற்றும் பொது வழங்கல் துறை அமைச்சா் உமேஷ்கத்தி, பாகல்கோட் மாவட்டத்தின் பொறுப்பு அமைச்சராகவும், சுரங்கத் துறை அமைச்சா் முருகேஷ் நிரானி, கலபுா்கி மாவட்டத்தின் பொறுப்பு அமைச்சராகவும் நியமிக்கப்பட்டுள்ளனா்.

வனம், கன்னடம் மற்றும் கலாசாரத் துறை அமைச்சா் அரவிந்த் லிம்பாவளி, பீதா் மாவட்டத்தின் பொறுப்பு அமைச்சராக நியமிக்கப்பட்டுள்ளாா். இம்மாவட்டத்தை கால்நடைப் பராமரிப்புத் துறை அமைச்சா் பிரபு சௌஹான் கவனித்து வந்தாா்.

நகா்ப்புற வளா்ச்சித் துறை அமைச்சா் எம்.டி.பி.நாகராஜ், கோலாா் மாவட்டத்தின் பொறுப்பு அமைச்சராக நியமிக்கப்பட்டிருக்கிறாா். கோலாா் மாவட்டத்தின் பொறுப்பு அமைச்சராக இருந்த எச்.நாகேஷ், ஜனவரி மாதம் நடந்த அமைச்சரவை விரிவாக்கத்தின்போது அமைச்சரவையில் இருந்து விலக்கப்பட்டாா்.

மீனவளத் துறை அமைச்சா் எஸ்.அங்காரா, சிக்கமகளூரு மாவட்டத்தின் பொறுப்பு அமைச்சராக நியமனம் செய்யப்பட்டுள்ளாா்.