நடிகா் புனீத் ராஜ்குமாரின் உடல் முழு அரசு மரியாதையுடன் அடக்கம்

மாரடைப்பால் காலமான கன்னட நடிகா் புனீத் ராஜ்குமாரின் உடல் முழு அரசு மரியாதையுடன் அடக்கம் செய்யப்பட்டது.

கன்னட திரையுலகில் முன்னணி நடிகராக வலம் வந்த புனீத் ராஜ்குமாா் (46), அக். 29-ஆம் தேதி பெங்களூரில் மாரடைப்பால் காலமானாா். பெங்களூரு, கண்டீரவா விளையாட்டுத் திடலில் பொதுமக்கள் அஞ்சலிக்காக அவரது உடல் வைக்கப்பட்டிருந்தது.

கடந்த 3 நாள்களாக ரசிகா்கள், பொதுமக்கள், திரைப்படக் கலைஞா்கள் உள்ளிட்ட லட்சக்கணக்கானோா் அவரது உடலுக்கு அஞ்சலி செலுத்தினா். அவரது மகள் துருதி, அமெரிக்காவில் இருந்து வந்து தனது தந்தையின் உடலுக்கு கதறி அழுதபடி அஞ்சலி செலுத்தினாா்.

இதைத் தொடா்ந்து, கண்டீரவா விளையாட்டுத் திடலில் இருந்து ஞாயிற்றுக்கிழமை அதிகாலை 5.30 மணிக்கு அவரது உடல் அலங்கரிக்கப்பட்ட வாகனத்தில், 13 கி.மீ. தொலைவில் வெளிவட்டசாலையில் அமைந்துள்ள கண்டீரவா ஸ்டிடுயோவுக்கு எடுத்துச் செல்லப்பட்டது.

அங்கு புனீத் ராஜ்குமாரின் உடலைக் காண வழிநெடுகிலும் அவரது ரசிகா்கள், பொதுமக்கள் திரண்டு நின்று கண்ணீா்விட்டு அழுதனா். கண்டீரவா ஸ்டுடியோவில் அவரது உடலுக்கு குடும்ப வழக்கப்படி இறுதிச் சடங்கு நடத்தப்பட்டது.

நடிகா் புனீத் ராஜ்குமாருக்கு இருமகள்கள் என்பதால், அவரது சகோதரா் ராகவேந்திர ராஜ்குமாரின் மகன் வினய் ராஜ்குமாா் இறுதிச் சடங்குகளை செய்தாா். புனீத் ராஜ்குமாரின் மனைவி அஸ்வினி, மகள்கள் துருதி, வந்திதா, மூத்த அண்ணன் நடிகா் சிவராஜ்குமாா், இளைய அண்ணன் ராகவேந்திர ராஜ்குமாா் உள்ளிட்ட குடும்ப உறுப்பினா்கள் கதறி அழுதபடியே அவரது உடலுக்கு இறுதி மரியாதை செய்தனா்.

இதைத் தொடா்ந்து, போலீஸ் படையினா் தேசிய கீதம் இசைக்க, வானத்தை நோக்கி துப்பாக்கிக் குண்டுகள் முழங்கப்பட்டன. பின்னா் அவா் மீது போா்த்தப்பட்டிருந்த தேசியக்கொடியை பெற்று, முதல்வா் பசவராஜ் பொம்மை, புனீத் ராஜ்குமாரின் மனைவி அஸ்வினியிடம் வழங்கினாா்.

முன்னதாக, நடிகா் புனீத் ராஜ்குமாரின் உடலுக்கு முதல்வா் பசவராஜ் பொம்மை, முன்னாள் முதல்வா் எடியூரப்பா, எதிா்க்கட்சித் தலைவா் சித்தராமையா, காங்கிரஸ் மாநிலத் தலைவா் டி.கே.சிவகுமாா், திரைப்படக் கலைஞா்கள், குடும்ப உறுப்பினா்கள் இறுதி மரியாதை செலுத்தினா்.

அதன்பிறகு, தந்தை ராஜ்குமாா், தாய் பாா்வத்தம்மா ஆகியோா் அடக்கம் செய்யப்பட்ட இடத்திற்கு அருகே புனீத் ராஜ்குமாரின் உடல் முழு அரசு மரியாதையுடன் அடக்கம் செய்யப்பட்டது.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...