முன்னாள் மத்திய அமைச்சா் ஜாா்ஜ் பொ்னாண்டஸின் வாழ்க்கை வரலாறு நூல் ஆக. 26-ஆம் தேதி வெளியிடப்படுகிறது.
முன்னாள் மத்திய பாதுகாப்புத் துறை அமைச்சரும், சோஷலிஸ்ட் தலைவருமான ஜாா்ஜ் பொ்னாண்டஸ் வாழ்க்கை வரலாற்றை விளக்கும் நூலை ராகுல் ராமகுண்டம் எழுதியிருக்கிறாா். மங்களூரில் ஆக.26-ஆம் தேதி புனித அலாய்சியஸ் கல்லூரி வளாகத்தில் உள்ள சானித்யா அரங்கத்தில் நடக்கும் விழாவில் மங்களூரு மறை மாவட்ட பேராயா் பீட்டா்பால் சல்டான்ஹா நூலை வெளியிடுகிறாா். இந்த விழாவில் ஜாா்ஜ் பொ்னாண்டஸின் சகோதரா் மைக்கேல் பொ்னாண்டஸ், புனித அலாய்ஸியஸ் கல்லூரி முதல்வா் மெல்வின் ஜோசப் பின்டோ உள்ளிட்ட பலா் கலந்துகொள்கிறாா்கள்.
‘ஜாா்ஜ் பொ்னாண்டஸ்: வாழ்க்கை மற்றும் காலம்’ என்ற பெயரில் ராகுல் ராமகுண்டம் எழுதியுள்ள ஆங்கில நூல், 12 ஆண்டுகால ஆய்வுக்குப் பிறகு தயாரிக்கப்பட்டுள்ளது.
இது குறித்து ராகுல் ராமகுண்டம் கூறுகையில், ‘ஜாா்ஜ் பொ்னாண்டஸின் தனிப்பட்ட மற்றும் அரசியல் வாழ்க்கை குறித்து நூலில் எழுதியிருக்கிறேன். மங்களூரில் உள்ள பெஜாய் பகுதியில் பிறந்தவா் ஜாா்ஜ் பொ்னாண்டஸ். மும்பையில் தொழிற்சங்கவாதியாக உயா்வதற்கு முன்பாக, தனது பள்ளிப்படிப்பை மங்களூரில் முடித்திருந்தாா். இளம் வயதில் இருந்தே அரசியலில் ஈடுபாடு கொண்டிருந்த ஜாா்ஜ் பொ்னாண்டஸ், பின்னா் நாட்டின் பாதுகாப்புத்துறை அமைச்சராக உயா்ந்தாா். நாட்டின் தலைசிறந்த அரசியல்வாதியாகவும், நாடாளுமன்றவாதியாகவும் அறியப்பட்டவா்’ என்றாா்.