திருவள்ளுவா் பூங்கா புதுப்பிக்கும் பணி:குழு அமைக்க அதிமுக கோரிக்கை

திருவள்ளுவா் பூங்காவை புதுப்பிக்கும் பணிகளை கவனிக்க ஒருங்கிணைப்புக் குழு அமைக்க கா்நாடக மாநில அதிமுக கோரிக்கை விடுத்துள்ளது.

இதுகுறித்து கா்நாடக மாநில அதிமுக செயலாளா் எஸ்.டி.குமாா் வெளியிட்டுள்ள அறிக்கை:

திருவள்ளுவா் சிலை அமைந்திருக்கும் பூங்காவை புதுப்பிப்பது வரவேற்கத்தக்கது. ஆனால், இது தொடா்பாக எழுந்துள்ள சா்ச்சையில் இரு அரசியல் கட்சிகளுக்கு இடையே ஏற்பட்டுள்ள மோதல் தவிா்க்கப்பட வேண்டியது. திருவள்ளுவா் சிலையை அவமதிக்கும் எந்தச் செயலையும் யாரும் சகித்துக்கொள்ளமாட்டாா்கள். எனவே, திருவள்ளுவா் சிலை, அதன் பூங்காவை புதுப்பிக்கும் பணியை கண்காணித்து செயல்படுத்த அனைத்து தரப்பினரையும் உள்ளடக்கிய ஒருங்கிணைப்புக் குழுவை அமைக்க பெங்களூரு மாநகராட்சி, சிவாஜி நகா் தொகுதி எம்எல்ஏ ரிஸ்வான் அா்ஷத் ஆகியோா் முன்வரவேண்டும். இதுதொடா்பான முயற்சிக்கு கா்நாடக அதிமுக முழு ஒத்துழைப்பை அளிக்கும் என்று அதில் அவா் கூறியுள்ளாா்.

கா்நாடக திமுக:

இதுகுறித்து கா்நாடக மாநில திமுக பொருளாளா் கே.தட்சிணாமூா்த்தி கூறியதாவது:

18 ஆண்டுகளாக மூடிக்கிடந்த திருவள்ளுவா் சிலையை அன்றைய கா்நாடக முதல்வா் எடியூரப்பாவின் தலைமையில் அன்றைய தமிழக முதல்வா் மு.கருணாநிதி திறந்துவைத்தாா். பூங்கா புதுப்பிப்புப் பணி முடிந்ததும் பழைய கல்வெட்டு கண்டிப்பாக வைக்கப்படும். எனவே, பூங்கா புதுப்பிப்புப் பணிக்கு யாரும் இடையூறு செய்யக்கூடாது என்று கேட்டுக்கொள்கிறேன் என்றாா்.