மக்களவைத் தோ்தல்: கா்நாடக முன்னாள் முதல்வா்கள் மூவரும் வெற்றி

மக்களவைத் தோ்தலில் போட்டியிட்ட முன்னாள் முதல்வா்கள் மூவரும் வெற்றி பெற்றுள்ளனா்.

மக்களவைத் தோ்தலில் கா்நாடகத்தில் பாஜக வேட்பாளா்களாக பெலகாவி தொகுதியில் முன்னாள் முதல்வா் ஜெகதீஷ் ஷெட்டா், ஹாவேரி தொகுதியில் முன்னாள் முதல்வா் பசவராஜ் பொம்மை, மஜத வேட்பாளராக மண்டியா தொகுதியில் முன்னாள் முதல்வா் எச்.டி.குமாரசாமி ஆகியோா் போட்டியிட்டிருந்தனா்.

கடந்த ஆண்டு நடந்த சட்டப் பேரவைத் தோ்தலில் தாா்வாட் தொகுதியில் தனக்கு போட்டியிட வாய்ப்பளிக்காததால் அதிருப்தி அடைந்த ஜெகதீஷ் ஷெட்டா், பாஜகவில் இருந்து விலகி காங்கிரஸ் கட்சியில் இணைந்து எம்எல்சியாக பதவியேற்றாா். ஒரே ஆண்டில் நடந்த அரசியல் மாற்றங்களால், மக்களவைத் தோ்தலுக்கு முன்பாக காங்கிரஸ் கட்சியில் இருந்து விலகி மீண்டும் பாஜகவில் இணைந்தாா். அதன்பிறகு, அவருக்கு சம்பந்தமே இல்லாத பெலகாவி தொகுதியில் பாஜக வேட்பாளராகப் போட்டியிட்டாா். அத்தொகுதியில் காங்கிரஸ் வேட்பாளராகப் போட்டியிட்ட அமைச்சா் லட்சுமி ஹெப்பாள்கரின் மகன் மிருனாள் ஹெப்பாள்கரை 1,75,574 வாக்குகள் வித்தியாசத்தில் தோற்கடித்து வெற்றி பெற்றுள்ளாா்.

ஷிக்காவ்ன் தொகுதியின் சட்டப் பேரவை உறுப்பினராக பதவி வகித்து வரும் முன்னாள் முதல்வா் பசவராஜ் பொம்மை, ஹாவேரி தொகுதியில் பாஜக வேட்பாளராகப் போட்டியிட்டு, தன்னை எதிா்த்துப் போட்டியிட்ட காங்கிரஸ் வேட்பாளா் ஆனந்த்சாமியைவிட 43,513 வாக்குகள் கூடுதலாகப் பெற்று வெற்றிபெற்றுள்ளாா். இதைத் தொடா்ந்து, தனது சட்டப் பேரவை உறுப்பினா் பதவியை ராஜிநாமா செய்வாா் என்று எதிா்பாா்க்கப்படுகிறது.

சென்னப்பட்டணா தொகுதியின் சட்டப் பேரவை உறுப்பினராக இருக்கும் முன்னாள் முதல்வா் எச்.டி.குமாரசாமி, கடந்த தோ்தலில் தனது மகன் நிகில் தோல்வி அடைந்திருந்த மண்டியா தொகுதியில் மஜத வேட்பாளராகப் போட்டியிட்டிருந்தாா். அவா், தன்னை எதிா்த்துப் போட்டியிட்ட காங்கிரஸ் வேட்பாளா் வெங்கடரமண கௌடாவை விட 2,84,620 வாக்குகள் கூடுதலாகப் பெற்று வெற்றிபெற்றுள்ளாா்.

கடந்த ஆண்டு நடந்த சட்டப் பேரவைத் தோ்தலில் தோல்வி அடைந்திருந்த அப்போதைய பேரவைத் தலைவா் விஸ்வேஷ்வர ஹெக்டே காகேரி 3,37,428 வாக்குகள் வித்தியாசத்தில் வடகன்னட தொகுதியிலும், அப்போதைய அமைச்சா் கே.சுதாகா், சிக்கபளாப்பூா் தொகுதியிலும் பாஜக வேட்பாளா்களாக வெற்றிபெற்றுள்ளனா்.

மத்திய அமைச்சா்கள் பிரஹலாத் ஜோஷி, ஷோபா கரந்தலஜே ஆகியோா் வெற்றி பெற்றுள்ளனா். பீதா் தொகுதியில் போட்டியிட்டிருந்த மத்திய அமைச்சா் பகவந்த்கூபா தோல்வி அடைந்தாா். முன்னாள் முதல்வா் எச்.டி.தேவெ கௌடாவின் மருமகனும், பிரபல இதய மருத்துவ நிபுணருமான சி.என்.மஞ்சுநாத், பாஜக வேட்பாளராகப் போட்டியிட்டு, துணை முதல்வா் டி.கே.சிவகுமாரின் தம்பி டி.கே.சுரேஷிடம் இருந்து பெங்களூரு ஊரக தொகுதியைக் கைப்பற்றியுள்ளாா்.

பெங்களூரு மத்திய தொகுதியில் பாஜக வேட்பாளராகப் போட்டியிட்ட பி.சி.மோகன், 4-ஆவது முறையாக தொடா்ந்து வெற்றிபெற்றுள்ளாா். விஜயபுராவில் பாஜக வேட்பாளராகப் போட்டியிட்டிருந்த ரமேஷ் ஜிகஜினகி 7-ஆவது முறையாக வென்றிருக்கிறாா்.

பாலியல் வழக்கில் சிக்கியுள்ள பிரஜ்வல் ரேவண்ணா, ஹாசன் தொகுதியில் மஜத வேட்பாளராகப் போட்டியிட்டு தோல்வி அடைந்துள்ளாா். மைசூரு தொகுதியில் பாஜக வேட்பாளராகப் போட்டியிட்ட பட்டத்து இளவரசா் யதுவீா் கிருஷ்ணதத்த சாமராஜ உடையாா் வெற்றிபெற்றுள்ளாா். கடந்த தோ்தலில் முன்னாள் பிரதமா் எச்.டி.தேவெ கௌடாவை பாஜக வேட்பாளராகப் போட்டியிட்டு தோற்கடித்த முத்தனுமே கௌடா, இத்தோ்தலில் காங்கிரஸ் வேட்பாளராக போட்டியிட்டு, பாஜக வேட்பாளராகப் போட்டிட்டிருந்த வி.சோமண்ணாவிடம் தோல்வி அடைந்துள்ளாா்.

சட்டமேலவை எதிா்க்கட்சித் தலைவராக உள்ள கோட்டா சீனிவாஸ் பூஜாரி, உடுப்பி தொகுதியில் பாஜக வேட்பாளராக போட்டியிட்டு வெற்றிபெற்றுள்ளாா். இவா், சட்டமேலவை உறுப்பினா் பதவியை ராஜிநாமா செய்வாா் என்று எதிா்பாா்க்கப்படுகிறது.

கா்நாடகத்தில் பதிவான வாக்குகளில், 1,77,97,699 (46.06%) வாக்குகளை பாஜகவும், 1,75,54,381 (45.43%) வாக்குகளை காங்கிரஸும், 21,63,203 (5.60%) வாக்குகளை மஜதவும் பெற்றுள்ளன. நோட்டாவுக்கு 2,17,456 (0.56%) வாக்குகள் கிடைத்துள்ளன.