மாற்றுநில முறைகேடு: முதல்வா் சித்தராமையாவுக்கு எதிராக அமலாக்கத் துறை வழக்குப் பதிவு

பெங்களூரு: மாற்றுநில முறைகேடு தொடா்பாக முதல்வா் சித்தராமையாவுக்கு எதிராக அமலாக்கத் துறை வழக்குப் பதிவு செய்துள்ளது.

முதல்வா் சித்தராமையாவின் மனைவி பி.எம்.பாா்வதிக்கு மைசூரு நகர வளா்ச்சி ஆணையம், மாற்று நிலமாக ரூ. 62 கோடி மதிப்பிலான 14 வீட்டுமனைகள் ஒதுக்கியதில் முறைகேடு நடந்துள்ளது குறித்து விசாரிக்க, சித்தராமையா மீது வழக்கு தொடர ஆளுநா் தாவா்சந்த் கெலாட் அனுமதி அளித்து பிறப்பித்திருந்த உத்தரவை கா்நாடக உயா்நீதிமன்றம் செப். 24-ஆம் தேதி ஏற்றுக்கொண்டது. மேலும், இது தொடா்பாக கீழமை நீதிமன்றத்தில் நடந்து வரும் விசாரணைக்கு விதித்திருந்த இடைக்காலத் தடையை கா்நாடக உயா்நீதிமன்றம் திரும்பப் பெற்றுக் கொண்டது.

இதைத் தொடா்ந்து, முதல்வா் சித்தராமையாவுக்கு எதிராக தகவலறியும் சட்ட ஆா்வலா் ஸ்நேகமயி கிருஷ்ணா அளித்திருந்த புகாா் மனுவை செப். 25-ஆம் தேதி விசாரணைக்கு எடுத்துக்கொண்ட மக்கள் பிரதிநிதிகளுக்கான சிறப்பு நீதிமன்ற நீதிபதி சந்தோஷ் கஜானன் பட், கா்நாடக உயா்நீதிமன்ற தீா்ப்பின் அடிப்படையில், முதல்வா் சித்தராமையா மீதான குற்றச்சாட்டுகளை விசாரிக்க லோக் ஆயுக்த போலீஸாருக்கு உத்தரவிட்டாா். குற்றவியல் நடைமுறைகள் சட்டப்பிரிவு 156(3)-இன் கீழ் விசாரணைக்கு உத்தரவிட்ட நீதிபதி, அடுத்த 3 மாதங்களுக்குள் அதாவது டிச. 24-ஆம் தேதிக்குள் விசாரணை அறிக்கையை தாக்கல் செய்ய உத்தரவிட்டாா்.

இதைத் தொடா்ந்து, மைசூரு மாவட்ட லோக் ஆயுக்த போலீஸாா், முதல்வா் சித்தராமையா, அவரது மனைவி பி.எம்.பாா்வதி, மைத்துனா் மல்லிகாா்ஜுன சுவாமி ஆகியோா் மீது செப். 27-ஆம் தேதி முதல் தகவல் அறிக்கையை (எஃப்.ஐ.ஆா்.) தாக்கல் செய்தனா். இதில் முதல் குற்றவாளியாக முதல்வா் சித்தராமையா, இரண்டாம் குற்றவாளியாக பாா்வதி, மூன்றாம் குற்றவாளியாக மல்லிகாா்ஜுன சுவாமி ஆகியோா் சோ்க்கப்பட்டுள்ளனா். நீதிமன்ற உத்தரவின் பேரில், இந்திய தண்டனைச் சட்டப் பிரிவுகள் 120பி, 166, 403, 406, 420, 426, 465, 468, 340, 351, ஊழல் தடுப்புச் சட்டப் பிரிவுகள் 9, 13, பினாமி சொத்துப் பரிமாற்ற தடை சட்டப் பிரிவுகள் 3, 53, 54, கா்நாடக நில அபகரிப்பு தடைச் சட்டப் பிரிவுகள் 3, 4 ஆகியவற்றின் கீழ் வழக்குப் பதிவு செய்யப்பட்டுள்ளது.

இந்நிலையில், பெங்களூரில் உள்ள அமலாக்கத் துறை அலுவலகத்தில் முதல்வா் சித்தராமையாவுக்கு எதிராக ஸ்நேகமயி கிருஷ்ணா திங்கள்கிழமை புகாா் அளித்தாா். அந்த மனுவில், முதல்வா் சித்தராமையாவின் மனைவி பாா்வதிக்கு மாற்று நிலமாக ரூ. 62 கோடி மதிப்பிலான வீட்டுமனைகள் சட்டவிரோதமாக ஒதுக்கப்பட்டுள்ளதோடு, பிறருக்கு வீட்டுமனைகள் ஒதுக்கியதில் ரூ. 5,000 கோடி அளவுக்கு முறைகேடு நடந்திருக்கிறது. எனவே, இதுகுறித்து அமலாக்கத் துறை விசாரிக்க வேண்டும் என்று குறிப்பிட்டிருந்தாா். இதனடிப்படையில், முதல்வா் சித்தராமையா மீது அமலாக்கத் துறை வழக்குப் பதிவு செய்துள்ளது.

இதைத் தொடா்ந்து, பெங்களூரு, மைசூரில் உள்ள முதல்வா் சித்தராமையா வீடு, மைசூரு நகர வளா்ச்சி ஆணையத்தின் அலுவலகங்களை அமலாக்கத் துறை அதிகாரிகள் சோதனை நடத்த வாய்ப்புள்ளது. மேலும், முதல்வா் சித்தராமையாவை கைது செய்து விசாரிக்கவும் அமலாக்கத் துறை திட்டமிட்டுள்ளது.