திட்டப் பணிகள்: அமைச்சா் ஆய்வு

செங்கல்பட்டு மாவட்டத்தில் திட்டப் பணிகளை அமைச்சா் ஆய்வு செய்தாா்.

ஊரக வளா்ச்சி, ஊரகத் திட்டப் பணிகள், வாழ்வாதாரப் பணிகள் குறித்து ஆய்வு கூட்டம் ஊரக வளா்ச்சித் துறை அமைச்சா் கே.ஆா்.பெரியகருப்பன் தலைமையில் செங்கல்பட்டு மாவட்ட ஆட்சியா் அலுவலகத்தில் சனிக்கிழமை நடைபெற்றது.

கூட்டத்தில் 367 மகளிா் சுய உதவிக் குழுக்களுக்கு வங்கிக் கடனையும், ரூ .2276 .58 லட்சம் மதிப்பீட்டிலான அரசு நலத் திட்ட உதவிகளையும் அமைச்சா் கே.ஆா்.பெரியகருப்பன் வழங்கினாா்.

முன்னதாக, திருப்போரூா் ஒன்றியத்துக்கு உள்பட்ட செம்பாக்கம் ஊராட்சியில் பழங்குடியினருக்கான பசுமை வீடுகளைத் திறந்துவைத்து, மகாத்மா காந்தி தேசிய ஊரக வேலை வாய்ப்பு திட்டத்தின்கீழ் பழங்குடியினா் குடியிருப்பு பகுதியில் மரக்கன்றுகள் நடும் பணியையும் அமைச்சா் பெரியகருப்பன் தொடக்கிவைத்தாா்.

மேலும், காட்டாங்கொளத்தூா் ஒன்றியத்துக்கு உள்பட்ட கொண்டமங்கலம் ஊராட்சியிலும், சிங்கப்பெருமாள்கோயிலிலும் திட்டப் பணிகளை அவா் தொடங்கிவைத்தாா்.

ஊரகத் தொழில்துறை அமைச்சா் தா.மோ.அன்பரசன், ஊரக வளா்ச்சி, ஊராட்சித் துறை முதன்மை செயலா் டாக்டா் கே.கோபால், இயக்குநா் பிரவீன் பி.நாயா், தமிழ்நாடு மகளிா் மேம்பாட்டு நிறுவன மேலாண்மை இயக்குநா் ம.பல்லவி பல்தேவ், மாவட்ட ஆட்சியா் ஆா்.ராகுல்நாத், மக்களவை உறுப்பினா் செல்வம், சட்டப்பேரவை உறுப்பினா்கள் எம்.வரலட்சுமி, இ,கருணாநிதி, எஸ்.அரவிந்த் ரமேஷ், எஸ்.எஸ்.பாலாஜி, ஊரக வளா்ச்சி முகமைத் திட்ட இயக்குநா் செல்வம், மாவட்ட மகளிா் திட்ட இயக்குநா் ஸ்ரீதா் உள்ளிட்டோா் கலந்துகொண்டனா் .