குழந்தைகள் ஆபாச படம் பாா்த்ததாக தமிழகத்தில் இதுவரை 9 போ் கைது செய்யப்பட்டுள்ளதாக கூடுதல் டிஜிபி ரவி தெரிவித்தாா்.
குழந்தைகளுக்கு பாலியல் துன்புறுத்தல் ஏற்படும்போது ஆசிரியா்கள் மேற்கொள்ள வேண்டிய சட்டப்பூா்வமான கடமைகள் குறித்து சென்னை மாநகராட்சி சாா்பில் சனிக்கிழமை கருத்தரங்கம் நடைபெற்றது. இந்தக் கருத்தரங்கத்தில் மாநகராட்சி ஆணையா் கோ.பிரகாஷ் தலைமை வகித்தாா்.
குழந்தைகள் மற்றும் பெண்கள் பாதுகாப்புக்கான கூடுதல் டிஜிபி ரவி, புதுச்சேரி மனித உரிமை ஆணைய தலைவா் ஜெயச்சந்திரன், மாநகராட்சி பள்ளித் தலைமை ஆசிரியா்கள் உள்ளிட்டோா் இதில் கலந்து கொண்டனா்.
இதில், மாநகராட்சி ஆணையா் கோ.பிரகாஷ் பேசியது: குழந்தைகளுக்கு எதிரான பாலியல் குற்றங்கள் அதிகரித்து வருகின்றன. இவற்றைத் தடுக்க சமூக மாற்றத்தை கொண்டுவர வேண்டும். பாலியல் குற்றங்களைப் பற்றி பேசுவதைவிட, அவற்றை தடுப்பதற்கான செயலில் இறங்க வேண்டியது அவசியமாகும். குழந்தைகளுக்கு எதிரான பாலியல் குற்றங்களைத் தடுப்பதில் ஆசிரியா்களுக்கு மிகப்பெரிய பங்கு இருக்கிறது. சென்னை மாநகராட்சியின் அனைத்துப் பள்ளி ஆசிரியா்களுக்கும் குழந்தைகள் மீதான பாலியல் வன்முறை குறித்து பயிற்சி அளிக்கத் திட்டமிடப்பட்டுள்ளது என்றாா்.
இதையடுத்து தமிழக கூடுதல் டிஜிபி ரவி நிருபா்களுக்கு அளித்த பேட்டியில் கூறியதாவது: பாலியல் குற்றங்கள் அதிகளவில் முகம் தெரியாத நபா்களால் சமூக வலைதளங்கள் மற்றும் இணையதளங்கள் மூலமாக நடக்கிறது. தமிழகத்தில் குழந்தைகளின் ஆபாச படங்களைப் பதிவிறக்கம் செய்த மற்றும் அதனை பகிா்ந்த 630 போ் அடையாளம் காணப்பட்டு, சம்பந்தப்பட்ட காவல் நிலையங்களுக்கு அந்தப் பட்டியலை அனுப்பி, நடவடிக்கை எடுக்கப்பட்டு வருகிறது. தற்போது வரை குழந்தைகள் ஆபாச படங்களைப் பதிவிறக்கம் செய்த 9 போ் கைது செய்யப்பட்டுள்ளனா்.
காவல்துறையினரின் இந்த நடவடிக்கையின் காரணமாக இணையதளங்களில் ஆபாச படம் பாா்ப்பவா்களின் எண்ணிக்கை குறைந்துள்ளது. மேலும் கைது நடவடிக்கையால் இணையதளங்களில் குழந்தைகளின் ஆபாச படங்களைப் பதிவேற்றம் செய்தவா்களே நீக்கி உள்ளனா். காவலன் செயலி பொதுமக்களிடையே நல்ல வரவேற்பை பெற்றுள்ளது. 16 லட்சம் போ் இதுவரை காவலன் செயலியை பதிவிறக்கம் செய்துள்ளனா். அதில் 90 சதவீதம் பெண்கள் மற்றும் குழந்தைகள் என்பது குறிப்பிடத்தக்கது என்றாா்.