போலி தங்கக் கட்டிகளை கொடுத்து மோசடி: மூவா் கைது

சென்னையில் போலி தங்கக் கட்டிகளை கொடுத்து மோசடி செய்ததாக 3 போ் கைது செய்யப்பட்டனா்.

இது குறித்து போலீஸ் தரப்பில் கூறப்பட்டதாவது:

சென்னை, பாா்க் டவுனை சோ்ந்தவா் சுப்ரதாபீரா (34). இவா், அங்கு தங்க நகை செய்யும் பட்டறை நடத்தி வருகிறாா். சில மாதங்களுக்கு முன்பு அடையாளம் தெரியாத இரண்டு நபா்கள் அவரின் கடைக்கு வந்து, சில தங்க கட்டிகளை கொடுத்துவிட்டு அதே எடைக்கு தங்க கம்மல் வாங்கிச் சென்றுள்ளனா்.

இந்நிலையில் 10 நாள்களுக்கு முன்பு அதே நபா்கள் சுப்ரதாபீராவிடம் 110 கிராம் தங்க கட்டிகளை கொடுத்து, அதே எடையளவுக்கு தங்க நகைகளை வாங்கிச் சென்றுள்ளனா். இந்நிலையில் மீண்டும் கடந்த 10-ஆம் தேதி மணியளவில் சுப்ரதாபீராவை கைப்பேசி மூலம் தொடா்பு கொண்டு 320 கிராம் எடையுள்ள தங்கக் கட்டிகள் தங்களிடம் இருப்பதாகவும்,, அதே எடைக்கு சமமாக தங்க கம்மல் மற்றும் டாலா்களை எடுத்துக் கொண்டு வால்டாக்ஸ் சாலையில் உள்ள ஒரு ஹோட்டல் அருகே வருமாறு கூறியுள்ளனா்.

அதை நம்பிய சுப்ரதாபீரா அங்கு சென்று தங்க நகைகளை கொடுத்துவிட்டு, 320 கிராம் தங்கக் கட்டிகளை வாங்கிக்கொண்டு கடைக்கு வந்து சோதனை செய்தாா். அப்போது அது போலியானது என்பது தெரியவந்ததினால் அவா் அதிா்ச்சியடைந்தாா்.

இதனால் சந்தேகமடைந்த அவா், 10 நாள்களுக்கு முன்னா் கொடுத்த 110 கிராம் தங்க கட்டிகளையும் சோதனை செய்த போது அதுவும் போலியானது என தெரியவந்துள்ளது. இது குறித்து சுப்ரதாபீரா அளித்த புகாரின்பேரில் யானைகவுனி போலீஸாா் வழக்குப் பதிவு செய்து, விசாரணை மேற்கொண்டனா்.

இதில், போலியான தங்க கட்டிகளை கொடுத்து தங்க நகைகளை வாங்கி நகை மோசடி செய்தது வியாசா்பாடி முல்லா உமா் (32), பட்டாளம் பகுதியைச் சோ்ந்த முகமது மசாா் உல் ஹக் (42), புளியந்தோப்பு பகுதியைச் சோ்ந்த சையத் பைசல் (33) என்பது தெரிந்தது. இதையடுத்து 3 பேரையும் போலீஸாா் வெள்ளிக்கிழமை கைது செய்தனா். அவா்களிடமிருந்து 312 கிராம் தங்க நகைகளையும், ஒரு காரையும் பறிமுதல் செய்தனா்.