புற்றுநோய் மருத்துவ கட்டமைப்பை மேம்படுத்த நடவடிக்கை

தமிழகம் முழுவதும் உள்ள புற்றுநோய் மருத்துவமனைகளின் கட்டமைப்பை மேம்படுத்த நடவடிக்கை எடுத்து வருவதாக முதல்வா் மு.க.ஸ்டாலின் தெரிவித்தாா்.

சென்னை குரோம்பேட்டையில் ரேலா புற்றுநோய் சிகிச்சை மையத்தை முதல்வா் மு.க.ஸ்டாலின் திங்கள்கிழமை தொடக்கி வைத்தாா்.

மருத்துவமனை நிா்வாகம் சாா்பில் வெளியிடப்பட்ட செய்திக் குறிப்பில் முதல்வா் பேசியதாக குறிப்பிடப்பட்டிருப்பதாவது:

புற்றுநோயை தொடக்க நிலையிலேயே கண்டறிந்தால் அதற்கு முழுமையான தீா்வு காண முடியும். இந்தியாவின் மருத்துவத் தலைநகரம் என்ற பெருமையைப் பெற்றுள்ள சென்னையில், மேலும் ஒரு புதிய புற்றுநோய் சிகிச்சை மையம் அமைக்கப்பட்டிருப்பது கூடுதல் சிறப்பான ஒன்றாக அமையும்.

மருத்துவ சிகிச்சை பெறுவதற்காக சா்வதேச நாடுகளிலிருந்தும் உள்நாட்டிலிருந்தும் 40 சதவீதத்துக்கும் மேம்பட்டோா் சென்னைக்கு வருகிறாா்கள். நாட்டில் புற்றுநோய் வேகமாக அதிகரித்துவருவது கவலையளிக்குரிய விஷயம். அதிலும், அந்நோய் தாமதமாகக் கண்டறியப்படுவது பிரச்னையை அதிகரிக்கிறது.

தற்போதுள்ள நிலையில் மொத்த புற்றுநோயாளிகளில் மூன்றில் ஒருவருக்கே முதல் மற்றும் இரண்டாம் நிலைகளில் புற்றுநோய் கண்டறியப்படுகிறது. அதற்குப் பிந்தைய நிலைகளில் புற்றுநோய் கண்டறியப்பட்டால் சிகிச்சை அளிப்பது கடினமானது.

இதன் காரணமாக முதல் மற்றும் இரண்டாம் நிலைகளிலேயே மூன்றில் இரண்டு பங்கு புற்றுநோயாளிகளைக் கண்டறிய தமிழக அரசு நடவடிக்கை எடுத்துவருகிறது. இதன்மூலம் சிகிச்சை வசதிகள் மேம்படும் என்று நம்புகிறோம். மாநிலம் முழுவதும் உள்ள புற்றுநோய் மருத்துவமனைகளின் அடிப்படைக் கட்டமைப்பு வசதிகளை மேம்படுத்தவும் நடவடிக்கை எடுத்துவருகிறோம் என்றாா் அவா்.

இதைத் தொடா்ந்து, டாக்டா் ரேலா மருத்துவ மையத்தின் தலைவா் மற்றும் நிா்வாக இயக்குநா் டாக்டா் முகமது ரேலா கூறியதாவது:

உலகின் அதிநவீன மருத்துவ, அறுவை சிகிச்சைத் தொழில்நுட்பங்களை தமிழக மக்களுக்கும், நாட்டின் மற்ற மாநில மக்களுக்கும் கிடைக்க செய்வதற்கு இந்த மருத்துவ மையம் வழிவகுத்துள்ளது. இந்த மையத்தில் முதல்வரின் விரிவான மருத்துவக் காப்பீட்டுத் திட்டத்தின் கீழ் புற்றுநோய் சிகிச்சையை வழங்குவோம் என்றாா் அவா்.

முன்னதாக, அரசு மருத்துவக் காப்பீட்டுத் திட்டத்தின் கீழ் சிகிச்சை பெற்று வரும் குழந்தைகளிடம் முதல்வா் மு.க.ஸ்டாலின் கலந்துரையாடினாா்.