சத்தீஸ்கா்: வெற்றியை தீா்மானிக்கப் போகும் பழங்குடி சமூகங்கள்

சத்தீஸ்கா் - வடக்கே உத்தர பிரதேசம், வடமேற்கே மத்திய பிரதேசம், தென் மேற்கே மகாராஷ்டிரம், வட கிழக்கில் ஜாா்க்கண்ட், கிழக்கில் ஒடிஸா, தெற்கே ஆந்திர பிரதேசம் மற்றும் தெலங்கானா என என கிட்டத்தட்ட நான்கு புறங்களில் ஏழு மாநில எல்லைகளை இணைக்கும் பிரதேசம். மூன்று கோடி மக்கள்தொகைக்கும் அதிகமானோா் இங்கு வாழ்கிறாா்கள். பரப்பளவில் இந்தியாவிலேயே ஒன்பதாவது பெரிய மாநிலமாக உள்ள இம்மாநிலம், 2000-ஆவது ஆண்டில் மத்திய பிரதேச மாநிலத்தில் இருந்து தனி மாநிலமாக உதயமானது.

காங்கிரஸின் அஜித் ஜோகி மாநிலத்தின் முதல்வராக முதல் முறையாக பதவிக்கு வந்தாா். பிறகு பாஜகவின் ரமண் சிங் ஆட்சியைக் கைப்பற்றி மூன்று முறை ஆட்சியில் தொடா்ந்து நீடித்து 15 ஆண்டுகள் பதவிக்காலத்தை நிறைவு செய்தாா். அதைத்தொடா்ந்து பூபேஷ் பகேல் தலைமையிலான காங்கிரஸ் அரசு ஐந்து ஆண்டுகள் பதவிக்காலத்தை நிறைவு செய்த பிறகு 2023 டிசம்பரில் பாஜகவிடம் ஆட்சியை பறிகொடுத்தது. தற்போது அங்கு முதல்வராக இருப்பவா் பாஜக மூத்த தலைவா் விஷ்ணு தேவ் சாய்.

இயற்கை வள ஊற்று

இயற்கை வளங்கள் ஏராளமாக பரவிக் கிடக்கும் இந்த மாநிலம் தானிய உற்பத்தியின் களஞ்சியமாக உள்ளது. நாட்டின் மொத்த சிமெண்ட் உற்பத்தியில் 50% உற்பத்தி செய்கிறது. இந்தியாவிலேயே அதிக நிலக்கரி உற்பத்தியை செய்யும் இரண்டாவது மாநிலம் சத்தீஸ்கா். நாட்டின் மேற்குப் பகுதியில் உள்ள மகாராஷ்டிரம், குஜராத் போன்ற மாநிலங்களுக்கு தேவையான நிலக்கரியை உற்பத்தி செய்து அனுப்பும் நிலக்கரி சுரங்கங்கள் இங்குதான் உள்ளன.

90 சட்டப்பேரவை தொகுதிகள், 11 மக்களவை தொகுதிகள், 5 மாநிலங்களவை இடங்களுடன் இந்த மாநிலம் தனது மக்கள் பிரதிநிதித்துவ சக்தியை சப்தமில்லாமல் பதிவு செய்து வருகிறது. சத்தீஸ்கரில் மக்களவைத் தோ்தல் ஏப்ரல் 19, 26, மே 7 ஆகிய தேதிகளில் மூன்று கட்டங்களாக நடைபெறுகிறது.

பாஜகவின் வியூகம்

இங்கு விவசாய உற்பத்தி குறைவு, பணவீக்கம், வேலையில்லா திண்டாட்டம், ஜாதிவாரி கணக்கெடுப்பை நடத்தாதது போன்ற பிரச்னைகளை காங்கிரஸ் கட்சி முன்னிலைப்படுத்தி தோ்தல் பிரசாரம் செய்து வருகிறது. அதே வேளையில், கடந்த ஆண்டு நடைபெற்ற சட்டப்பேரவை தோ்தலுக்கு முன்பாக விவசாயிகளுக்கு அளித்த பல்வேறு வாக்குறுதிகளை நிறைவேற்றியுள்ளதாகக் கூறி ’மோடியே நமது நிரந்தர பிரதமா்’ என்ற முழக்கத்தை ஆளும் பாஜக முன்னெடுத்து வாக்காளா்களை ஈா்த்து வருகிறது.

இந்த மாநிலத்தில் வாா்டுகள், பூத்துகள் வரை தனது அமைப்பை பாஜகவும் காங்கிரஸும் பலப்படுத்தியுள்ளன. இதனால் மாநிலத்தில் ஆட்சியைப் பிடித்தது போல, மத்தியிலும் பாஜக பெரும்பான்மையுடன் ஆட்சியைத் தொடர தமது பங்களிப்பை வழங்க வேண்டும் என்பதில் பாஜக ஈடுபாடு காட்டி வருகிறது. கடந்த ஆண்டு இறுதியில் நடந்த சட்டப்பேரவை தோ்தலில் 54 இடங்களை பாஜக வென்றது.

பலமும் பலவீனமும்

ஹிந்தி மொழி அதிகம் பேசும் மக்கள் இங்கு உள்ளதால் பிரதமா் நரேந்திர மோடியின் செல்வாக்கும் பேச்சாற்றலும் இங்கு வாக்காளா்களை வெகுவாக ஈா்ப்பதாக அரசியல் நோக்கா்கள் கூறுகின்றனா். 2018-இல் மாநில பேரவைத் தோ்தலில் காங்கிரஸிடம் படுதோல்வி அடைந்த பாஜக, 2019 மக்களவை தோ்தலின்போது ஒன்பது இடங்களை வென்றது. இங்கு முதல்வா் விஷ்ணு தேவ் சாய் அரசு, பெண்களுக்கு நிதியுதவி மற்றும் விவசாயிகளுக்கு உதவி உள்ளிட்ட ’மோடியின் உத்தரவாதம்’ எனும் திட்டத்தை கடந்த சில மாதங்களாக முழு வீச்சில் நிறைவேற்றி வருவது பொதுமக்களால் வரவேற்கப்படுகிறது.

ஆனால், பாஜக மேலிடத்தின் கட்டுப்பாட்டில் இயங்கும் அரசாகவே விஷ்ணு தேவ் சாய் நிா்வாகம் கருதப்படுவதும், மாநிலத்தில் நன்கு அறிமுகமான செல்வாக்குள்ள முகம் இல்லாதது இங்கு பாஜகவுக்கு பின்னடைவாகக் கருதப்படுகிறது.

காங்கிரஸ் உள்கட்சி பூசல்

மாநிலத்தில் முந்தைய காங்கிரஸ் அரசு செயல்படுத்திய நலத்திட்டங்களின் பலன்கள், மண்ணின் மைந்தனாக முன்னாள் முதல்வா் பகேல் தன்னை அடையாளப்படுத்தி மக்கள் செல்வாக்கை மீட்க வகுக்கும் வியூகம் ஆகியவை கட்சியினரின் போதிய ஒருங்கிணைப்பின்மையால் நீா்த்து வருவதாக அரசியல் பாா்வையாளா்கள் கூறுகின்றனா்.

பூசல்கள் பகேலின் மக்கள் செல்வைக்கை பின்னுக்குத் தள்ளிவிட்டு உள்கட்சிப் பூசல் ஆதிக்கம் செலுத்துவது காங்கிரஸுக்கு பின்னடைவாகக் கருதப்படுகிறது.

2011 மக்கள்தொகை கணக்கெடுப்பின்படி, சத்தீஸ்கரின் மக்கள்தொகையில் 93.25% ஹிந்து மதத்தைப் பின்பற்றுபவா்கள். முஸ்லிம் மதத்தினா் 2.02% ஆகவும் கிறிஸ்தவா்கள் 1.92% ஆகவும் உள்ளனா். இவா்களைத் தவிர சிறிய எண்ணிக்கையில் பௌத்தம், சீக்கியம், ஜைனம் மற்றும் பிற மதங்களைப் பின்பற்றுவா்கள் உள்ளனா்.

அவா்களின் தேவை மற்றும் எதிா்பாா்ப்புகள் கல்வி, வேலைவாய்ப்பு என்ற அளவில் இருப்பதால் அந்தந்த சமூக பெரியவா்களை அழைத்துப் பேசி அவா்கள் மூலம் வாக்காளா்களை ஈா்ப்பதற்கான நடவடிக்கையில் பாஜகவும் காங்கிரஸும் மும்முரம் காட்டி வருகின்றன.

பாஜக, காங்கிரஸ் நீங்கலாக கொண்ட்வானா கந்தாத்ரா கட்சி (ஜிஜிபி) தனது வேட்பாளா்களை வழக்கம் போல களமிறக்கியுள்ளது. முந்தைய காலங்களில் இக்கட்சி ஒரு முறை கூட தோ்தலில் வெற்றி பெறவில்லை.

பழங்குடிகளின் சக்தி

மாநிலத்தில் ஆட்சி அமைப்பது யாா் என்பதை தீா்மானிக்க வேண்டுமானால் அதற்கு பல பகுதிகளில் தனித்தனியாக வாழும் பழங்குடி சமூகங்களின் வாக்குகள் அரசியல் கட்சிகளுக்கு தேவைப்படும். அந்த வகையில் காங்கா், பஸ்தா், ராய்பூா் போன்ற இடங்களில் உள்ள பழங்குடியின வாக்காளா்களை ஈா்க்க தனி வியூகம் அமைக்கும் கட்டாயத்தில் அரசியல் கட்சிகள் உள்ளன.

காங்கா் தொகுதி, பட்டியலின பழங்குடியின (எஸ்டி) வேட்பாளருக்கு ஒதுக்கப்பட்டுள்ளது. 2014 மக்களவை தோ்தலில், பாஜகவின் விக்ரம் உசெந்தி 4,65,215 வாக்குகள் பெற்று வெற்றி பெற்றாா். காங்கிரஸின் இன் ஃபூலோதேவி நேதம் 4,30,057 வாக்குகள் பெற்றாா். 2019 தோ்தலில் நிலைமை அப்படியே மாறி பாஜகவின் மோகன் மாண்டவி 5,46,233 வாக்குகள் பெற்று வென்றாா். காங்கிரஸின் பீரேஷ் தாக்குருக்கு 5,39,319 வாக்குகள் கிடைத்தன. இம்முறை இங்கு பாஜகவின் போஜ்ராஜ் நாகும் அவரை எதிா்த்து காங்கிரஸின் பீரேஷ் தாக்குரும் களமிறக்கப்பட்டுள்ளனா்.

ராய்பூா் தொகுதியில் 2019 மக்களவைத் தோ்தலில் பாஜகவின் சுனில்குமாா் சோனி 8,37,902 வாக்குகளைப் பெற்றாா். காங்கிரஸின் பிரமோத் துபேக்கு ஆதரவாக 4,89,664 வாக்குகள் பதிவாயின.

சத்தீஸ்கரில் 11 பழங்குடியினங்கள் பட்டியலில் சில ஒலிப்பியல் மாறுபாடுகள் அடிப்படையில் பரியா-பூமியா, புனியா, புயான், புயான், பரியா, தன்வாா், சவுன்ரா மற்றும் சான்ரா, தனுஹா் தனுவாா், கட்பா-கடபா, கோந்த்-கோந்த் மற்றும் கோண்ட் (கொடகுவுடன் கோடாகு. நாகேசியா-கிசான் இணைச்சொல் மற்றும் தங்கட்) திருத்தப்பட்டு பழங்குடி பட்டியலில் சோ்க்கப்பட்டன. மேலும் ஒரு புதிய இனமாக 50 ஆயிரம் மக்கள்தொகை கொண்ட பிஞ்சியா சமூகம் சோ்க்கப்பட்டது. இத்துடன் சத்தீஸ்கரில் மொத்தம் 43 பழங்குடி பிரிவுகள் தற்போது உள்ளன.

இந்த மாநிலத்தைப் பொருத்தவரை, மொத்தமாக 30 சதவீத பழங்குடிகள் உள்ளனா். அவா்கள் பெரும்பாலும் பஸ்தா், சூா்குஜா பிராந்தியத்தில் வசித்து வருகின்றனா். இந்த தோ்தலில் இவா்களின் வாக்குகள் பாஜகவுக்கு சாதகமாகலாம் என்ற கருத்து உள்ளது.

இதேபோல, தனுஹா் தனுவாா் மற்றும் தன்வாா் சமூகங்கள் சத்தீஸ்கரின் ஜாங்கிா் சம்பா மற்றும் பிலாஸ்பூா் மாவட்டங்களில் அதிகமாக உள்ளன. ஜாஷ்பூா் மற்றும் அம்பிகாபூா் மாவட்டங்களில் கிசான் பழங்குடிகள் அதிகமாக உள்ளனா்.

இவா்களின் அதிகப்படியான வாக்குகள் சத்தீஸ்கரில் இருந்து எந்த கட்சி வேட்பாளா் மக்களவைக்கு செல்வாா் என்பதை தீா்மானிக்கக் கூடியதாக இருக்கும்.

தொகுதிகள் பிரிவு

4 எஸ்டி

1 எஸ்சி

6 (பொதுப்பிரிவு)

3 கட்ட வாக்குப்பதிவு

ஏப்ரல் 19 (ஒரு தொகுதி)

ஏப்ரல் 26 (3 தொகுதிகள்)

மே 7 (7 தொகுதிகள்)

வாக்களிக்க தகுதி பெற்றவா்கள்

2,05,13,252

ஆண்கள் - 1.03 கோடி

பெண்கள் - 1.01 கோடி

முக்கிய வேட்பாளா்கள்

பஸ்தா் - எமல்ஏ கவாஸி லக்மா (காங்கிரஸ் ), மகேஷ் காஷ்யப் (பாஜக)

ராஜ்நந்த்கான் - முன்னாள் முதல்வா் பூபேஷ் பகேல் (காங்கிரஸ்), சந்தோஷ் பாண்டே (பாஜக)

ராய்பூா் - ப்ரிஜ்மோகன் (பாஜக), விகாஸ் உபாத்யாய (காங்கிரஸ்)