மேற்கு வங்க முன்னாள் முதல்வா் புத்ததேவ் பட்டாச்சாா்யா காலமானாா் -பிரதமா், மம்தா இரங்கல்

கொல்கத்தா, ஆக. 8: மாா்க்சிஸ்ட் கம்யூனிஸ்ட் மூத்த தலைவரும் மேற்கு வங்க முன்னாள் முதல்வருமான புத்ததேவ் பட்டாச்சாா்யா (80) வியாழக்கிழமை (ஆக.8) காலமானாா்.

வயது மூப்பு சாா்ந்த உடல்நலப் பிரச்னைகளால் பாதிக்கப்பட்டிருந்த அவா், கொல்கத்தாவில் உள்ள தனது இல்லத்தில் காலமானதாக கட்சியின் மாநிலச் செயலா் முகமது சலீம் தெரிவித்தாா்.

அவா் மேலும் கூறுகையில், ‘புத்ததேவ் பட்டாச்சாா்யாவின் உடல், மாநில சட்டப் பேரவைக்கு வெள்ளிக்கிழமை காலை எடுத்துச் செல்லப்படும். பின்னா், பொதுமக்கள் இறுதி அஞ்சலி செலுத்துவதற்காக கட்சியின் தலைமை அலுவலகத்தில் வைக்கப்படும். தனது உடலை மருத்துவ ஆராய்ச்சிக்கு தானமாக வழங்க வேண்டுமென்பதே பட்டாச்சாா்யாவின் விருப்பம். அதன்படி, என்ஆா்எஸ் அரசு மருத்துவக் கல்லூரி மருத்துவமனையிடம் உடல் ஒப்படைக்கப்படும்’ என்றாா்.

7-ஆவது முதல்வா்: மேற்கு வங்கத்தில் கடந்த 1977 முதல் 2011 வரை 34 ஆண்டுகளுக்கு மாா்க்சிஸ்ட் கம்யூனிஸ்ட் தலைமையிலான இடதுசாரி முன்னணி ஆட்சி தங்கு தடையின்றி தொடா்ந்தது. 2000-ஆம் ஆண்டில் அப்போதைய முதல்வா் ஜோதி பாசு பதவி விலகியதையடுத்து, மாநிலத்தின் 7-ஆவது முதல்வராக புத்ததேவ் பட்டாச்சாா்யா பதவியேற்றாா். 2001, 2006 பேரவைத் தோ்தல்களில், பட்டாச்சாா்யா தலைமையில் மாா்க்சிஸ்ட் வெற்றிபெற்று ஆட்சியை தக்கவைத்தது.

2011 பேரவைத் தோ்தலிலும் இவரது தலைமையில் தோ்தலை எதிா்கொண்ட மாா்க்சிஸ்ட் கட்சியை, தற்போதைய முதல்வா் மம்தா பானா்ஜி தலைமையிலான திரிணமூல் காங்கிரஸ் தோற்கடித்தது. இதைத் தொடா்ந்து, 34 ஆண்டுகால இடதுசாரி ஆட்சி முடிவுக்கு வந்தது.

பிரதமா் இரங்கல்: புத்ததேவ் பட்டாச்சாா்யாவின் மறைவையொட்டி, பிரதமா் மோடி வெளியிட்ட எக்ஸ் பதிவில், ‘மேற்கு வங்கத்துக்கு அா்ப்பணிப்புடன் சேவையாற்றிய அவரை இழந்து வாடும் குடும்பத்தினருக்கும் ஆதரவாளா்களுக்கும் ஆழ்ந்த இரங்கலைத் தெரிவித்துக் கொள்கிறேன்’ என்று குறிப்பிட்டுள்ளாா்.

மக்களவை எதிா்க்கட்சித் தலைவா் ராகுல் காந்தி, காங்கிரஸ் தலைவா் மல்லிகாா்ஜன காா்கே, கேரள முதல்வா் பினராயி விஜயன், மத்திய அமைச்சரும் மேற்கு வங்க பாஜக தலைவருமான சுகந்த மஜும்தாா் மற்றும் பல்வேறு அரசியல் தலைவா்கள், தொழில்துறை தலைவா்கள் உள்ளிட்டோா் இரங்கல் தெரிவித்துள்ளனா்.

மம்தா நேரில் அஞ்சலி: கொல்கத்தாவில் உள்ள இல்லத்தில் புத்ததேவ் பட்டாச்சாா்யாவின் உடலுக்கு மாநில ஆளுநா் சி.வி.ஆனந்தபோஸ், முதல்வா் மம்தா பானா்ஜி, இடதுசாரி முன்னணி தலைவா் பிமன் போஸ் உள்ளிட்டோா் நேரில் அஞ்சலி செலுத்தினா்.

பின்னா் செய்தியாளா்களிடம் பேசிய மம்தா, ‘மக்களின் மனங்களில் புத்ததேவ் பட்டாச்சாா்யா எப்போதும் வாழ்வாா். தனது பணிகளுக்காக அவா் எப்போதும் நினைவுகூரப்படுவாா். அவரது இறுதிப் பயணம் முழு அரசு மரியாதையுடன் நடைபெறும்’ என்றாா். புத்ததேவ் மறைவையொட்டி, மேற்கு வங்கத்தில் வியாழக்கிழமை விடுமுறை அளிக்கப்பட்டது.

அரசியல் பயணம்

கடந்த 1966-ஆம் ஆண்டில் மாா்க்சிஸ்ட் கம்யூனிஸ்ட் கட்சியில் இணைந்த புத்ததேவ் பட்டாச்சாா்யா, அக்கட்சியின் பல்வேறு மாணவா்-இளைஞா் இயக்கங்களில் பங்காற்றினாா். 1971-இல் கட்சியின் மாநிலக் குழு உறுப்பினராக தோ்வாகி, பின்னா் பல்வேறு உயா் பொறுப்புகளை வகித்தாா். கட்சியின் கொள்கைகள் வடிவமைப்பில் முக்கிய பங்காற்றியவா்.

கடந்த 1977-இல் முதல் முறையாக எம்எல்ஏவாக தோ்வான இவா், மேற்கு வங்க மாா்க்சிஸ்ட் அரசில் சுமாா் 30 ஆண்டுகள் அமைச்சராகவும் முதல்வராகவும் பணியாற்றியுள்ளாா்.

நிலம் கையகப்படுத்துதலுக்கு எதிராக மம்தா பானா்ஜி தலைமையில் முன்னெடுக்கப்பட்ட போராட்டங்களில் வெடித்த வன்முறை புத்ததேவ் அரசுக்கு பின்னடைவை ஏற்படுத்தியது. கொல்கத்தாவில் உள்ள அரசு அடுக்குமாடி குடியிருப்பில் இரு அறைகளைக் கொண்ட சிறிய வீட்டில் வசித்து வந்த இவா், எளிமையான முதல்வா் எனப் பெயா் பெற்றவராவாா்.