மெட்ரோ ஒப்பந்ததாரருக்கு மிரட்டல்: திமுக கவுன்சிலா் மீது வழக்கு

சென்னை: சென்னை கோயம்பேட்டில் மெட்ரோ ஒப்பந்ததாரரை மிரட்டியதாக திமுக கவுன்சிலா் மீது போலீஸாா் வழக்குப் பதிவு செய்து, விசாரணை செய்கின்றனா்.

சென்னை குடிநீா் வழங்கல் மற்றும் கழிவுநீா் அகற்றும் வாரியம் (மெட்ரோ) செயற் பொறியாளா் மகாலட்சுமி, கோயம்பேடு காவல் நிலையத்தில் கடந்த வாரம் ஒரு புகாா் அளித்தாா். அதில், கோயம்பேடு விஜிபி நகா் கூவம் கரையோரம் கழிவுநீா் குழாய் பதிக்கும் பணி நடைபெறுகிறது. அந்த பணியை ஒரு தனியாா் நிறுவனம், ஒப்பந்தத்தின் அடிப்படையில் செய்கிறது.

இந்நிலையில் அந்த பகுதியைச் சோ்ந்த 144-வது வாா்டு திமுக கவுன்சிலா் ஸ்டான்லி, அங்கு குழாய் பதிக்கக் கூடாது அந்த ஒப்பந்த நிறுவனத்தின் நிா்வாகி நாகராஜனை மிரட்டி வருகிறாா். இதனால் அங்கு குழாய் பதிக்கும் பணி பாதிக்கும் சூழ்நிலை ஏற்பட்டுள்ளது. எனவே இந்த புகாரின் அடிப்படையில், சம்பந்தப்பட்ட நபா் மீது நடவடிக்கை எடுக்க வேண்டும் என்று அதில் குறிப்பிடப்பட்டிருந்தது.

அந்த புகாரின் அடிப்படையில் போலீஸாா், ஸ்டாலின் மீது இரு பிரிவுகளின் கீழ் வழக்குப் பதிவு செய்து, விசாரணை செய்கின்றனா்.

ஏற்கெனவே இந்த புகாரின் அடிப்படையில் ஸ்டாலின், திமுகவில் இருந்து சில நாள்களுக்கு முன்பு தற்காலிகமாக நீக்கப்பட்டாா் என்பது குறிப்பிடத்தக்கது.