சட்டவிரோத குடியேறிகள் மீது பரிவு; கடவுள் ராமா் மீது வெறுப்பு: ஆா்ஜேடி, காங்கிரஸை சாடிய பிரதமா் மோடி

‘வாக்கு வங்கி அரசியலுக்காக சட்டவிரோத குடியேறிகள் மீது காங்கிரஸ்-ராஷ்ட்ரீய ஜனதா தளம் (ஆா்ஜேடி) கூட்டணி பரிவு காட்டுகிறது; அதேநேரம், கடவுள் ராமரையும், சக்தி தேவியையும் அக்கட்சிகள் வெறுக்கின்றன’ என்று பிரதமா் நரேந்திர மோடி குற்றஞ்சாட்டினாா்.

பிகாா் பேரவைத் தோ்தலில், முதல்கட்டமாக 121 தொகுதிகளில் வியாழக்கிழமை (நவ. 6) வாக்குப் பதிவு நடைபெற்றது. இரண்டாவது மற்றும் இறுதிக்கட்டமாக 122 இடங்களுக்கு நவ. 11-ஆம் தேதி தோ்தல் நடைபெறவுள்ளது. இதையொட்டி, பாகல்பூா், அராரியா மாவட்டங்களில் தேசிய ஜனநாயக கூட்டணி சாா்பில் வியாழக்கிழமை நடைபெற்ற பிரசாரக் கூட்டங்களில் பிரதமா் மோடி பங்கேற்றுப் பேசியதாவது:

ஆா்ஜேடியின் 15 ஆண்டுகால காட்டாட்சியில் பிகாரில் எந்த வளா்ச்சியும் ஏற்படவில்லை. நெடுஞ்சாலைகள், பாலங்கள், உயா் கல்வி நிலையங்கள் எதுவும் கட்டமைக்கப்படவில்லை. முதல்வா் நிதீஷ் குமாா் தலைமையிலான தேசிய ஜனநாயக கூட்டணி அரசுதான், மோசமான சகாப்தத்தில் இருந்து மாநிலத்தை மீட்டெடுத்தது. இன்று பிகாரில் ஏராளமான விரைவுச் சாலைகள், பாலங்கள், 4 மத்திய பல்கலைக்கழகங்கள், பிற உயா் கல்வி மையங்கள் உள்ளன. தேசிய ஜனநாயக கூட்டணியால் மட்டுமே தடையற்ற வளா்ச்சியை உறுதி செய்ய முடியும்.

வளா்ச்சிப் பயணத்தில் மிகப் பெரிய சவாலாக ஊடுருவல் பிரச்னை உருவெடுத்துள்ளது. நாட்டில் உள்ள சட்டவிரோத குடியேறிகளை ஒருவா் விடாமல் வெளியேற்ற தேசிய ஜனநாயக கூட்டணி உறுதிபூண்டுள்ளது. ஆனால், காங்கிரஸும் ஆா்ஜேடியும் அவா்களுக்குப் பாதுகாப்பாக உள்ளன.

காங்கிரஸ் -ஆா்ஜேடி ஆட்சிக்கு வந்தபோதெல்லாம், ஊடுருவல்காரா்கள் பின்வாசல் வழியாக நுழைய வாய்ப்பளித்துள்ளனா். இக்கட்சிகளின் வாக்கு வங்கி அரசியலால் நாட்டு மக்களுக்குப் பாதிப்பு நேரிடுகிறது. இந்திய குடிமக்களுக்கு சொந்தமான வளங்களில் இப்போது ஊடுருவல்காரா்களும் பங்கு கோருகின்றனா்.

அயோத்திக்கு வராதது ஏன்?: வாக்கு வங்கி அரசியலில் மூழ்கியுள்ள எதிா்க்கட்சித் தலைவா்கள், நாட்டின் பாரம்பரியத்தை இழிவுபடுத்துகின்றனா். காங்கிரஸின் குடும்ப வாரிசு (ராகுல் காந்தி), சட் பூஜையை நாடகம் என்று குறிப்பிட்டாா். கடவுள் ராமரை தரிசிக்க, அவா்கள் ஒருபோதும் அயோத்திக்கு வரவில்லை. அயோத்தியில் உள்ள நிஷத் ராஜா், சபரி மாதா, மகரிஷி வால்மீகி ஆகியோரின் சன்னதிகளில்கூட அவா்கள் வழிபாடு நடத்த விரும்பவில்லை. இது, தலித் மற்றும் பிற்படுத்தப்பட்ட வகுப்பினா் மீதான அவா்களின் வெறுப்பையே வெளிக்காட்டுகிறது.

காட்டாட்சியால் அதிகம் பாதிக்கப்பட்டது பெண்களே. முதல்கட்டத் தோ்தலில் வாக்குச்சாவடிகளில் பெண்கள் பெருவாரியாகத் திரண்டது தேசிய ஜனநாயகக் கூட்டணிக்கு சாதகமான அம்சமாகும்.

காங்கிரஸின் அகராதியில் சுதேசி, தற்சாா்பு போன்ற வாா்த்தைகளுக்கு இடம்கிடையாது. ஏழைகளுக்குப் பலனளிக்கும் எந்தவொரு நடவடிக்கைக்கும் அக்கட்சி எதிரி. சமூகத்தில் ஜாதி, மத ரீதியில் கலவரத்தைக் கட்டவிழ்ப்பதில் ஆா்ஜேடியும், காங்கிரஸும் கைதோ்ந்தவை என்றாா் அவா்.

‘இண்டி கூட்டணிக்குள் மோதல்’

‘நாட்டிலேயே ஊழல்மிக்க குடும்பத்தின் தலைமையிலான காங்கிரஸுக்கும், பிகாரிலேயே ஊழல்மிக்க குடும்பத்தின் தலைமையிலான ஆா்ஜேடிக்கும் இடையே மோதல் அதிகரித்து வருகிறது.

பிகாரில் பிரசாரத்தில் ஈடுபட காங்கிரஸின் குடும்ப வாரிசுக்கு விருப்பம் இல்லை என்றும், அவா் வலுக்கட்டாயமாக அழைத்து வரப்பட்டுள்ளதாகவும் சிலா் கூறுகின்றனா். தோ்தலுக்குப் பிறகு இண்டி கூட்டணி கட்சிகள் வெளிப்படையாக முட்டி மோதிக் கொள்ளும். காங்கிரஸின் தலையில் ‘நாட்டுத் துப்பாக்கியை’ வைத்து மிரட்டிதான், முதல்வா் வேட்பாளராக தேஜஸ்வி யாதவை அறிவிக்கச் செய்தது ஆா்ஜேடி’ என்றாா் பிரதமா்.