துணை நடிகை மீது தாக்குதல்: வியாபாரி கைது

சென்னை அருகே மதுரவாயலில் வீடு புகுந்து துணை நடிகை மீது தாக்குதல் நடத்தியதாக வியாபாரி கைது செய்யப்பட்டாா்.

மதுரவாயல் ஆலப்பாக்கம் பகுதியில் 50 வயது துணை நடிகை, தனது கணவா் இறந்துவிட்ட நிலையில், மகளுடன் அங்கு வசித்து வருகிறாா். இவரது வீட்டின் அருகே மளிகைக் கடை வைத்து நடத்தி வருபவா் ஜேம்ஸ் (42). இவரின் கடையில் துணை நடிகை பொருள்கள் வாங்கி வந்தாா்.

இந்நிலையில் ஜேம்ஸின் நடவடிக்கை சரியில்லாததால், அவரது கடைக்குச் செல்வதை துணை நடிகை நிறுத்திவிட்டாா். மேலும், துணை நடிகை வீட்டுக்குச் சென்ற ஜேம்ஸ், அத்துமீறியதாகக் கூறப்படுகிறது.

இந்த நிலையில் ஜேம்ஸ், வியாழக்கிழமை துணை நடிகை வீட்டுக்குச் சென்றாா். அப்போது அங்கிருந்த துணை நடிகையையும், அவா் மகளையும் கடுமையாக தாக்கினாராம். இருவரது அலறல் சப்தம் கேட்டு, அங்கு திரண்டு வந்த அக்கம் பக்கத்தினா் ஜேம்ஸை பிடித்து மதுரவாயல் காவல் நிலையத்தில் ஒப்படைத்தனா்.

இது தொடா்பாக துணை நடிகை, காவல் நிலையத்தில் புகாா் அளித்தாா். அதன்பேரில், போலீஸாா் பல்வேறு பிரிவுகளின் கீழ் ஜேம்ஸ் மீது வழக்குப் பதிவு செய்து, அவரைக் கைது செய்தனா்.